Tarazdyq turǵyn túrmede otyrǵan týǵan aǵasynyń kesirinen jumysqa ornalasa almaı júr. Sebebi sot shatasyp aǵasyn inisiniń qujatymen sottap jibergen kórinedi, - dep habarlaıdy Dalanews.kz Informbúro jańalyqtar qyzmetine silteme jasap.
Mundaı jaǵdaıǵa túzeý mekemesiniń basshylyǵy men prokýrorlar da ań-tań. Ózi bostandyqta, qujat boıynsha túzeý kolonıasynda jatqan Erjan Bolatov adam aıtsa nanǵysyz jaǵdaıda.
Qyzylordada jasaǵan qylmysy úshin Erjan Bolatovtyń týǵan aǵasy isti bolǵan eken. Biraq tergeý barysynda da, adam taǵdyry sheshiler sot otyrysynda da jeke basy anyqtalmaı, inisiniń qujatymen sheshim shyǵaryp jibergen.
"Meniń osy sıstemada jumys istep júrgenime qansha jyl boldy. Birinshi ret osyndaı jaǵdaıdy kórip otyrmyn. Qyzylordaǵa jumysqa barǵan Mahambet Bolatov isti bolady. Qolǵa túsken sátte inisiniń jeke kýáligi qaltasynan shyqqan. Kýáliktegi sýreti aýmaǵan soń tergeýshiler anyqtaýǵa emes dereý sottaýǵa asyqqandaı",- deıdi Jambyl oblystyq №59 QAJD bastyǵy Rýslan Ýrazmetov.
"Teksermegen. Meniń aǵam aıtqan ol kisilerge aıtqan. Bul meniń inimniń pasporty. Men emes. Meniń atym Bolatov Mahambet. Al pasport meniń inimniń pasporty dep aıtqan. Ol kisiler oǵan senbeı Mahambet emes Erjan dep sottap jibergen. Negizi Bolatov Erjan men bolamyn", - deıdi Erjan Bolatov.
Osylaısha osy jyldyń maýsymynda Qyzylorda qalalyq №2 soty Mahambet Bolatovty urlyq jasaǵany úshin úsh jylǵa bas bostandyǵynan aıyrady. Biraq qujat boıynsha inisin sottap jiberipti. Bir qyzyǵy balasynyń sottalyp jatqanynan jaqyndary beıhabar bolǵan. Bul jaǵdaıdan soń prokýrorlar saýsaq izderin saraptap, qamaýdaǵy azamat Erjan emes týǵan aǵasy Mahambet ekeni belgili bolypty.
"Sottalǵan Bolatovtyń óziniń týǵan inisiniń qujattarymen Qyzylorda qalasynyń sotymen basqa esimde zańsyz sot úkimi shyqqany anyqtaldy. Ol mán-jaılardy dáleldeý úshin biz qajetti sarapshylardy tarta otyryp bul jaǵdaılardy daktılskopıalyq mamandardyń zertteýi arqyly sottalǵannyń sóziniń rastylyǵy ornyn taýyp tıisti hat, bas prokýratýraǵa jáne Qyzylorda oblystyq prokýratýrasyna joldanǵan",- deıdi Jambyl oblysy prokýratýrasynyń basqarma prokýrory Asylbek Peshekov.
Qazir qujattan jańylysqan jaǵdaı boıynsha is qaıta qaraýǵa jiberildi. Al sýdıa jańylǵan jerin bilýge muraǵat aqtarypty. Onda tergeýshilerdiń kórsetken bıologıalyq saraptamasynda qylmysker Erjan Bolatov dep kórsetilgen deıdi. Sot soǵan saı quqyqtyq baǵa bergenin jetkizdi. Al tergeý barysynda aǵattyqtyqtyń kim jibergeni endigi tergeýmen anyqtalatyn boldy. Oǵan deıin Erjan Bolatov kóldeneń kisi kózine kórinýden qorqady. Qujat boıynsha qamaýdaǵy adam bolǵan soń jumysqa da tura almaıdy.
