6 qazandaǵy referendýmda AES salýdy qoldaý jónindegi Halyqtyq shtab músheleri belsendi daýys berýde. Osylaisha, alty saiasi partiianyń jetekshileri – shtab músheleri óz daýysyn berdi, dep habarlaidy Dalanews.kz.
Májilis spikeri, Amanat partiiasynyń tóraǵasy Erlan Qoshanov "Qazaqstan temir joly" ulttyq kompaniiasy" AQ ǵimaratynda ornalasqan №163 sailaý ýchaskesinde daýys berdi.
"Búgin – bizdiń memleketimiz úshin óte mańyzdy kún. Elimizdiń bolashaǵyna qatysty úlken sheshim qabyldanýda. Eń bastysy, bul sheshimdi halyq qabyldap jatyr. Buǵan deiin biz Konstitýtsiialyq reforma qabyldadyq. Onyń basty maqsaty – ár adamnyń memlekettiń saiasi ómirine erkin qatysýyn qamtamasyz etý. Búgin biz sonyń naqty iske asqanyn kórip otyrmyz. Barlyq aimaqtaǵy azamattarymyz óz daýsyn berip jatyr. Óńirlerden kelip jatqan aqparattarǵa qaraǵanda, belsendilik óte joǵary. Halyq memleketimizdiń bolashaǵy úshin durys tańdaý jasaidy dep oilaimyn", – dedi jýrnalisterdiń suraǵyna jaýap bergen Erlan Qoshanov.
Sondai-aq, AES qurylysy boiynsha jalpyrespýblikalyq referendýmda Qazaqstan Halyq partiiasynyń tóraǵasy Ermuhamet Ertisbaev Astanadaǵy M. Ótemisov atyndaǵy Oqýshylar saraiynda ornalasqan elordalyq ýchaskede daýys berdi.
"Bul referendým – Qazaqstan úshin ǵana emes, búkil postkeńestik elder úshin de óte mańyzdy oqiǵa. Halqymyzǵa eldegi atom energetikasy siiaqty strategiialyq salanyń ary qaraiǵy damý jolyn ózderi sheshim qabyldai otyryp aiqyndaýǵa biregei quqyq berildi", – dedi ol.
"Aq jol" demokratiialyq partiiasynyń kóshbasshysy, Májilis depýtaty Azat Perýashev Astana qalasyndaǵy №66 mektep ǵimaratynda ornalasqan №165 sailaý ýchaskesinde daýys berdi.
"Qazaqstandyqtardy energetikamyz ben tutas ekonomikamyzdyń bolashaǵyna qatysty mundai mańyzdy oqiǵamen quttyqtaimyn: damyǵan eldermen birge tehnologiialyq jáne progressshil keleshekke qatar baramyz ba, joq, álde, tas-kómir dáýirinde qalamyz ba; bul tańdaýdy Qazaqstan halqynyń ózi jasaidy", – dedi ol.
Osy ýchaskede "Respublica" partiiasynyń tóraǵasy, Májilis depýtaty Aidarbek Qojanazarov ta daýys berdi.
"Meniń oiymsha búgin – elimiz úshin óte mańyzdy kún. Sebebi biz ekonomikalyq baǵytta, Táýelsizdik baǵytynda úlken tańdaý jasaimyz. Memleket basshysy ár qazaqstandyqtyń pikirin eskerý úshin AES salý máselesin referendýmǵa shyǵardy", – dedi ol.
Sondai-aq, jalpyrespýblikalyq plebistsitke Baitaq jasyldar partiiasynyń tóraǵasy Azamathan Ámirtaev ta qatysty. Ol №92 mektep-litseiinde ornalasqan №53 sailaý ýchaskesinde daýys berdi.
"El erteńine áser etetin sheshimge úles qosyp, daýys berý – azamattyq boryshym", – dedi ol.
Al "Aýyl" partiiasynyń tóraǵasy, Májilis depýtaty Serik Egizbaev partiialastarymen birge Kókshetaý qalasyndaǵy №22 sailaý ýchaskesinde daýys berdi.
