Prezident Qasym-Jomart Toqaev Euronews basylymynda jariialanǵan avtorlyq maqalasynda Qazaqstan men Eýropalyq odaq arasyndaǵy seriktestiktiń kelesi onjyldyqtaǵy negizgi baǵyttaryn aiqyndady. Maqala memleket basshysynyń Briýsselge sapary qarsańynda jaryq kórdi, dep habarlaidy dalanews.kz.
Toqaevtyń pikirinshe, Qazaqstan men Eýroodaq arasyndaǵy yntymaqtastyq endi naqty nátijelerge baǵyttalýy tiis. Ol aldaǵy on jyldaǵy ózara áriptestiktiń úsh strategiialyq basymdyǵyn atady.
Birinshi baǵyt – ekonomikalyq bailanystardy tereńdetý. Prezident Qazaqstan Eýropanyń senimdi saýda jáne investitsiialyq seriktesi bolyp qala beretinin atap ótti. Onyń aitýynsha, taraptar shikizat jetkizýmen ǵana shektelmei, qosylǵan quny joǵary óndiristerdi damytýǵa basymdyq berýi kerek.
Ekinshi basymdyq – kólik jáne logistika salasyndaǵy yntymaqtastyq. Memleket basshysy geosaiasi ózgerister jaǵdaiynda Eýropa men Aziiany jalǵaityn Transkaspii halyqaralyq kólik baǵytynyń, iaǵni Orta dálizdiń mańyzy artyp kele jatqanyn jazdy. Onyń pikirinshe, bul baǵyt eki qurlyq arasyndaǵy saýda ainalymyn ulǵaitýǵa múmkindik beredi.
Úshinshi baǵyt retinde Toqaev tsifrlandyrý, innovatsiia jáne jasandy intellekt salasyndaǵy áriptestikti atady. Prezident jańa tehnologiialar ekonomikalyq ósimniń basty draiverine ainalyp jatqanyn aityp, Qazaqstan men EO bul baǵytta kúsh biriktirýge múddeli ekenin jetkizdi.
Sonymen qatar maqalada energetika, sirek kezdesetin metaldar jáne jasyl ekonomika máseleleri de qamtylǵan. Toqaev Qazaqstan Eýropanyń mańyzdy shikizat seriktesteriniń biri bola alatynyn atap ótti.
«Ótken onjyldyq bizge tabysty seriktes bola alatynymyzdy kórsetti. Endigi mindet – osy seriktestikti naqty nátijelerge ainaldyrý», – dep jazdy Qazaqstan prezidenti.
