Almatydaǵy sailaý ýchaskelerinde barlyq turǵynǵa, onyń ishinde erekshe qajettiligi bar adamdarǵa daýys berý úshin teń jaǵdai jasalǵan. Kórý jáne tirek-qimyl apparaty buzylǵan sailaýshylar úshin «Invataksi» qyzmet kórsetip, olardy sailaý ýchaskelerine deiin tasymaldaý qyzmetin usynady. Referendým kúni 100 mamandandyrylǵan kólik qyzmet kórsetip, múmkindigi shekteýli azamattardyń daýys berý oryndaryna yńǵaily ári qaýipsiz jetýin qamtamasyz etti.
Sonymen qatar, Almaty qalasy Halyqty jumyspen qamtý jáne áleýmettik baǵdarlamalar basqarmasynyń qoldaýymen barlyq sailaý ýchaskesinde onlain rejiminde 76 sýrdoaýdarmashy mamany jumys isteidi. Olar estý qabileti nashar sailaýshylarǵa referendým týraly tolyq aqparat alýǵa jáne daýys berý erejesin tanysýǵa kómektesedi. Óz betinshe sailaý ýchaskesine kele almaityndar úshin úide daýys berý múmkindigi qarastyrylǵan. Olarǵa daýys berý jáshikterin sailaý komissiiasynyń músheleri jetkizedi.
Merýert Qulahmetova «Invataksi» qyzmetin paidalanyp, №72 mektepte ornalasqan №123 ýchaskede daýys berdi.
«Ár adamnyń daýysy mańyzdy. Barlyq azamattyń teńdigi men múddesin qurmetteý arqyly ǵana kúshti jáne ádil qoǵam qurýǵa bolady. Referendým – fizikalyq múmkindigine qaramastan, árkimniń el bolashaǵyna úles qosatyn múmkindigi», – dedi Merýert.
Áleýmettik kásipker Ǵalymjan Báribaev №186 mektepte ornalasqan №515 ýchaskede daýys berdi.
«Birinshi toptaǵy kórý qabileti shekteýli azamat retinde invataksi qyzmetin paidalandym. Búgin referendýmǵa qatysyp, azamattyq mindetimdi oryndadym. Árbir azamattyń pikirin bildirý quqyǵy bar, bul elimizdiń saiasi ómiriniń mańyzdy bóligi», – dedi ol.
Inkliýzivtilikti arttyrýǵa jáne barshaǵa teń múmkindikti qamtamasyz etýge baǵyttalǵan bastamalar múgedektigi bar azamattarǵa referendýmǵa kedergisiz qatysýǵa múmkindik berdi. Bul qala ákimdiginiń barlyq turǵynǵa qoljetimdi ári jaily orta qurýǵa degen umtylysyn aiqyndaidy.
