2025 jyldyń 13 mamyry kúni saǵat 18:00 shamasynda Taraz qalasynda Almaty oblysy Ile aýdandyq máslihatynyń depýtaty, zańger Nurlan Baiǵaziev aýyr soqqyǵa jyǵyldy, dep habarlaidy Dalanews.kz.
Taraznews.kz málimetinshe, oqiǵa Tarazdaǵy “Ǵibrat” atty dámhanada oryn alǵan. Depýtat sol jerde klientterimen kezdesý ótkizip jatqanda, belgisiz bireý oǵan tutqiyldan shabýyl jasap, temir zatqa uqsas quralmen birneshe ret urǵan. Aldyn ala málimet boiynsha, Nurlan Baiǵaziev bas súiegine zaqym alyp, miy shaiqalǵan. Qazirgi ýaqytta ol aýrýhanada jatyr, dárigerler ony shuǵyl otaǵa daiyndaýda.
Qaskóilerdiń kim ekeni ázirge anyqtalmaǵan. Politsiia men meditsina qyzmetkerleri bul oqiǵaǵa qatysty ázirge túsinikteme bergen joq.
Aita keteiik, bul shabýyl Baiǵazievtiń atyshýly oqiǵadan keiingi eki apta ishinde oryn alyp otyr. 28 sáýirde ol kámeletke tolmaǵan 17 jastaǵy qyzdy toqtatyp, qyzmettik kóligine otyrǵyzbaq bolǵan iývenaldy politsiia qyzmetkerleriniń áreketin videoǵa túsirip alǵan. Baiǵaziev olardyń zańǵa qaishy áreketin áshkerelegen. Beinejazba áleýmettik jelilerde keńinen tarap, qoǵamda úlken rezonans týdyrdy. Artynsha qyzmettik tekseris nátijesinde álgi politseiler qyzmetinen bosatylǵan edi.
Bul oqiǵa – jurt aldynda ádiletsizdikpen kúresip júrgen azamatqa qarsy jasalǵan eskertý ispettes.
