Kóne shahardyń "Uly dala" yqshamaýdanynan salynǵan turǵyn úi kiltterin tabystaý saltanatyna oblystyq máslihat hatshysy Abdaly Nuraliev, Taraz qalasynyń ákimi Baqytjan Orynbekov jáne "Otbasy bank" AQ Basqarma tóraiymynyń orynbasary Nurlan Aqshanov pen Jambyl oblystyq filialynyń direktory Nurlan Sultanov qatysyp, páter ielerin qýanyshtarymen quttyqtady.
Biyl Taraz qalasynda 42 turǵyn úidiń qurylysy júrgizilip jatyr, jyl sońyna deiin 2820 páter paidalanýǵa berilmekshi.
– El turǵyndaryn qoljetimdi baspanamen qamtamasyz etý úshin aýqymdy jumystar atqarylyp, jyl saiyn qomaqty qarjy bólinip jatyr. Memleket basshysy Qasym-Jomart Toqaevtyń bastamasymen baiandy jobalar baǵdaryn taýyp, halyq baspana baqytyna kenelýde.
Sondai baǵdarlamanyń biri «Baqytty otbasymen» búgin birtalai tarazdyq otbasy baspana baqytyna bólenýde. Sońǵy onjyldyqtyń bederinde Taraz qalasynda jańa yqsham aýdandar boi kóterip, turǵyn úi sany arta tústi. Jalpy, sońǵy 4 jyl kóleminde (2019-2023 jyldary) Taraz qalasy boiynsha 5 800 páter berilse, memlekettik baǵdarlamalar arqyly 3 844 azamat baspanaly boldy, al páter kezeginde turǵan azamattarǵa 1 956 páter berildi.
Biyl salynatyn 42 turǵyn úidiń tórteýiniń qurylys jumystary aiaqtalyp, 460 páter óz ielerine tabystaldy. Úi salynarda turǵyndardyń suranysy eskeriledi. Máselen, búgingi berilip otyrǵan úide balalar oiyn alańy, sport alańshalary da salynǵan.
Munyń bári turǵyndardyń suranysyna qarai jasalǵan jumystar. Jańa úiler boi kóterip jatqan Uly dala yqshamaýdany – Taraz qalasynyń eń úlken aýdany. Aldaǵy ýaqytta bul yqshamaýdanda aitarlyqtai aýqymdy jumystar júrgiziledi. Dál osy jerden kólemi 10 gektardy quraityn saiabaq salynatyn bolady. Qazir bul yqshamaýdanda 4 mekteptiń qurylysy júrip jatyr, onyń ekeýi zamanaýi «Jaily mektep» baǵdarlamasymen salynýda, – degen Taraz qalasynyń ákimi Baqytjan Orynbekov jańa páterli bolyp jatqan turǵyndarǵa qutty qonys tiledi.
Otbasy bank "2-10-20" baǵdarlamasy boiynsha 16 myńnan astam qazaqstandyq otbasynyń jeke páter satyp alýyna muryndyq bolǵan. Atalmysh baǵdarlamany júzege asyrý úshin biyl bankke respýblikalyq biýdjetten 20 milliard teńge bólingen.
– Tabysy tómen otbasylarǵa turǵyn úi satyp alýǵa arnalǵan "2-10-20" baǵdarlamasyna qatysýshylar 2 paiyzdyq mólsherlememen jeńildetilgen nesie ala alady.
Iaǵni, bul baǵdarlamaǵa qatysýshy alǵashqy jarnasyna baspana baǵasynyń 10 paiyzyn tólep, qalǵan somany 20 jylǵa bólip óteidi. Jaqyn arada jańa ótinimderdi qabyldaý bastalatynyn qosymsha habarlaityn bolamyz.
Turǵyn úi-kommýnaldyq infraqurylymdy damytýdyń 2023-2029 jyldarǵa arnalǵan tujyrymdamasyna sáikes baǵdarlama sharttaryna ózgerister engizildi. Endi "jetim jáne ata-anasynyń qamqorlyǵynsyz qalǵan balalar", "I jáne II toptaǵy múgedektigi bar adamdar" sanattary boiynsha turǵyn úige kezekte turǵan qazaqstandyqtar da baǵdarlamaǵa qatysa alady.
Árqaisymyz úshin jańa, eń bastysy, ózimizdiń jeke pátirimizge kóshý - ómirdegi asa mańyzdy ári qýanyshty oqiǵa. Páterlerińizde balalardyń kúlkisi jii estilip, ishi jylýlyq pen jailylyqqa toly bolýyna tilektespin. Búgingi tańda Otbasy bank «2-10-20» baǵdarlamasy boiynsha 16 myńnan astam qazaqstandyq otbasyna jeke baspana alýǵa kómektesti.
Baǵdarlamanyń bolashaq qatysýshylary úshin jaqsy jańalyǵymyz bar. Biyl bankke respýblikalyq biýdjetten 20 milliard teńge bólindi. Bul basqa qatysýshylar da 2 paiyzdyq mólsherlememen jeńildetilgen nesie ala alady degen sóz.
Jaqyn arada jańa ótinimderdi qabyldaý bastalady, ony qosymsha habarlaimyz, – degen "Otbasy bank" AQ Basqarma tóraiymynyń orynbasary Nurlan Aqshanov baspanaly bolǵan tarazdyqtardyń baqytyna tilektestigin jetkizdi.
Aita keteiik, búgin iesin tapqan páterlerdiń quny bir sharshy metrge 160 myń teńgemen baǵalanǵan.
– Ár adamnyń ómiriniń túp negizi – óz úiiniń, oshaǵynyń bar bolýy. Otbasynyń berekesi de osyǵan bailanysty. «Úii joqtyń kúii joq» dep halyq beker aitpaidy. Otbasy bankinen turǵyn úi alý maqsatynda depozit ashyp, «Baqytty otbasy» baǵdarlamasymen óz baspanama búgin qolym jetti. Óte qýanyshtymyn jáne otbasymnyń atynan rizashylyǵymdy bildiremin. El igiligi úshin jasalǵan osyndai igi bastamalar jalǵasyn taba bersin.
Halyqtyń igiligine arnalǵan jumystar jemisti bolýyna tilektespin. Meniń otbasymmen birge búgin úili bolyp jatqan kórshilerime de jańa qonysymyz jaily bolýyn tileimin, – degen Qalamqas Mámbetalieva qýanyshyn kóppen bólisti.
"Otbasy bank" AQ Basqarma tóraiymynyń orynbasary Nurlan Aqshanovtyń aitýynsha, Jambyl oblysynda jas otbasylarǵa arnalǵan «Áýlieata jastary» baǵdarlamasy da sátti júzege asyp keledi.
Oblys ákimshiligi men Otbasy bank birlesip júrgizip otyrǵan bul baǵdarlamaǵa meditsina, bilim, mádeniet, sport salasynyń qyzmetkreleri men jýrnalist jastar qatysa alady. Oǵan biyl 2 milliard teńge bólingen, bul 130 jas otbasyn baspanamen qamtamasyz etýge jetedi.
Baǵdarlama arqyly baspana baǵasynyń 10 paiyzyn alǵashqy jarna retinde tólep, nesieni 5 paiyzdyq jeńildetilgen sharttarmen alýǵa múmkindik bar. Memlekettik baǵdarlamalardy iske asyryp, el azamattarynyń úi alýyna múmkindik týǵyzyp otyrǵan Otbasy bankiniń basty maqsaty – qazaqstandyqtardyń baspanaly bolýyna jaǵdai jasaý.
Qamar Qarasaeva,
Taraz qalasy.
