Tarazda eki politsiia qyzmetkeri ustalǵan azamatqa jalǵan aiyp taǵý úshin onyń qaltasyna esirtki salyp jiberdi degen kúdikke ilindi. Qazir bul derek boiynsha Jambyl oblysynda qylmystyq is tergelip jatyr, dep habarlaidy dalanews.kz.
Tergeý málimetinshe, biyl aqpan aiynda esirtki qylmysyna qarsy kúres basqarmasynyń kapitandary G.M. men A.E. Tarazdaǵy oiyn klýbtarynyń biriniń mańynda Ózbekstan azamaty H.D.-ny toqtatqan, dep jazady Halyqstan.
Kúdiktiler azamattyń qaltasyna esirtki salyp, keiin ony «taýyp alǵanyn» aityp, qylmystyq jaýapkershilikke tartpaý úshin 1,5 million teńge talap etken. Alaida er adam aqsha berýden bas tartqan. Osydan keiin politseiler oǵan esirtkiniń qai jerde jatqanyn ózderi kórsetip, jedel-tergeý toby kelgenge deiin esirtkini ótkizgenin moiyndatýǵa tyrysqan.
Bastapqyda H.D.-ǵa qatysty esirtkini zańsyz satty degen kúdikpen qylmystyq is qozǵalǵan. Alaida keiin tekserý barysynda politsiia qyzmetkerleriniń áreketine de quqyqtyq baǵa berile bastady.
Jaqynda is materialdary Taraz prokýratýrasynan Jambyl oblysy boiynsha Ulttyq qaýipsizdik komiteti departamentine joldandy. Qazir tergeý Qylmystyq kodekstiń 362-baby 4-bóliginiń 3-tarmaǵy («Bilikti nemese qyzmettik ókilettigin asyra paidalaný») boiynsha júrgizilip jatyr.
Aita keteiik, ótken jyldyń naýryz aiynda osy basqarmanyń taǵy birneshe jedel qyzmetkeri dál osy bap boiynsha kináli dep tanylyp, árqaisysy 7 jylǵa bas bostandyǵynan aiyrylǵan edi. Sondai-aq olar arnaiy ataqtarynan aiyrylyp, memlekettik qyzmette belgili bir laýazymdardy atqarý quqyǵynan ómir boiyna aiyryldy.
