تارازدا ەكٸ پوليتسييا قىزمەتكەرٸ ۇستالعان ازاماتقا جالعان ايىپ تاعۋ ٷشٸن ونىڭ قالتاسىنا ەسٸرتكٸ سالىپ جٸبەردٸ دەگەن كٷدٸككە ٸلٸندٸ. قازٸر بۇل دەرەك بويىنشا جامبىل وبلىسىندا قىلمىستىق ٸس تەرگەلٸپ جاتىر, دەپ حابارلايدى dalanews.kz.
تەرگەۋ مەلٸمەتٸنشە, بيىل اقپان ايىندا ەسٸرتكٸ قىلمىسىنا قارسى كٷرەس باسقارماسىنىڭ كاپيتاندارى گ.م. مەن ا.ە. تارازداعى ويىن كلۋبتارىنىڭ بٸرٸنٸڭ ماڭىندا ٶزبەكستان ازاماتى ح.د.-نى توقتاتقان, دەپ جازادى Halyqstan.
كٷدٸكتٸلەر ازاماتتىڭ قالتاسىنا ەسٸرتكٸ سالىپ, كەيٸن ونى «تاۋىپ العانىن» ايتىپ, قىلمىستىق جاۋاپكەرشٸلٸككە تارتپاۋ ٷشٸن 1,5 ميلليون تەڭگە تالاپ ەتكەن. الايدا ەر ادام اقشا بەرۋدەن باس تارتقان. وسىدان كەيٸن پوليتسەيلەر وعان ەسٸرتكٸنٸڭ قاي جەردە جاتقانىن ٶزدەرٸ كٶرسەتٸپ, جەدەل-تەرگەۋ توبى كەلگەنگە دەيٸن ەسٸرتكٸنٸ ٶتكٸزگەنٸن مويىنداتۋعا تىرىسقان.
باستاپقىدا ح.د.-عا قاتىستى ەسٸرتكٸنٸ زاڭسىز ساتتى دەگەن كٷدٸكپەن قىلمىستىق ٸس قوزعالعان. الايدا كەيٸن تەكسەرۋ بارىسىندا پوليتسييا قىزمەتكەرلەرٸنٸڭ ەرەكەتٸنە دە قۇقىقتىق باعا بەرٸلە باستادى.
جاقىندا ٸس ماتەريالدارى تاراز پروكۋراتۋراسىنان جامبىل وبلىسى بويىنشا ۇلتتىق قاۋٸپسٸزدٸك كوميتەتٸ دەپارتامەنتٸنە جولداندى. قازٸر تەرگەۋ قىلمىستىق كودەكستٸڭ 362-بابى 4-بٶلٸگٸنٸڭ 3-تارماعى («بيلٸكتٸ نەمەسە قىزمەتتٸك ٶكٸلەتتٸگٸن اسىرا پايدالانۋ») بويىنشا جٷرگٸزٸلٸپ جاتىر.
ايتا كەتەيٸك, ٶتكەن جىلدىڭ ناۋرىز ايىندا وسى باسقارمانىڭ تاعى بٸرنەشە جەدەل قىزمەتكەرٸ دەل وسى باپ بويىنشا كٸنەلٸ دەپ تانىلىپ, ەرقايسىسى 7 جىلعا باس بوستاندىعىنان ايىرىلعان ەدٸ. سونداي-اق ولار ارنايى اتاقتارىنان ايىرىلىپ, مەملەكەتتٸك قىزمەتتە بەلگٸلٸ بٸر لاۋازىمداردى اتقارۋ قۇقىعىنان ٶمٸر بويىنا ايىرىلدى.
