Almaty oblysy İle aýdandyq máslıhatynyń depýtaty Nurlan Baıǵazıevke Tarazda jasalǵan shabýylǵa baılanysty qylmystyq is qozǵaldy, dep habarlaıdy Dalanews.kz.
Bul týraly KazTag agenttigine Jambyl oblysy polısıa departamentiniń baspasóz qyzmeti málimdedi.
“Atalǵan fakti boıynsha Qazaqstan Respýblıkasy Qylmystyq kodeksiniń 293-baby 1-bóligine (Buzaqylyq) sáıkes sotqa deıingi tergeý amaldary bastaldy. Oqıǵaǵa qatysy bar tulǵa anyqtalyp, polısıaǵa jetkizildi. Jábirlenýshige medısınalyq kómek kórsetildi, alaıda ol aýrýhanaǵa jatýdan bas tartty. Qazirgi ýaqytta bul qylmystyq is aıasynda oqıǵanyń mán-jaıyn jan-jaqty jáne obektıvti anyqtaýǵa baǵyttalǵan barlyq qajetti tergeý jáne jedel-izdestirý sharalary júrgizilip jatyr”, – delingen polısıanyń resmı jaýabynda.
Aıta keteıik, 2025 jyldyń 13 mamyry kúni saǵat 18:00 shamasynda Taraz qalasynda Almaty oblysy İle aýdandyq máslıhatynyń depýtaty, zańger Nurlan Baıǵazıevtyń aýyr soqqyǵa jyǵylǵany týraly jazǵan edik.
Taraznews.kz málimetinshe, oqıǵa Tarazdaǵy “Ǵıbrat” atty dámhanada oryn alǵan. Depýtat sol jerde klıentterimen kezdesý ótkizip jatqanda, belgisiz bireý oǵan tutqıyldan shabýyl jasap, temir zatqa uqsas quralmen birneshe ret urǵan. Aldyn ala málimet boıynsha, Nurlan Baıǵazıev bas súıegine zaqym alyp, mıy shaıqalǵan. Qazirgi ýaqytta ol aýrýhanada jatyr, dárigerler ony shuǵyl otaǵa daıyndaýda.
Eske salaıyq, bul shabýyl Baıǵazıevtiń atyshýly oqıǵadan keıingi eki apta ishinde oryn alyp otyr. 28 sáýirde ol kámeletke tolmaǵan 17 jastaǵy qyzdy toqtatyp, qyzmettik kóligine otyrǵyzbaq bolǵan ıývenaldy polısıa qyzmetkerleriniń áreketin vıdeoǵa túsirip alǵan. Baıǵazıev olardyń zańǵa qaıshy áreketin áshkerelegen. Beınejazba áleýmettik jelilerde keńinen tarap, qoǵamda úlken rezonans týdyrdy. Artynsha qyzmettik tekseris nátıjesinde álgi polıseıler qyzmetinen bosatylǵan edi.
