الماتى وبلىسى ىلە اۋداندىق ءماسليحاتىنىڭ دەپۋتاتى نۇرلان بايعازييەۆكە تارازدا جاسالعان شابۋىلعا بايلانىستى قىلمىستىق ءىس قوزعالدى، دەپ حابارلايدى Dalanews.kz.

بۇل تۋرالى كازتاگ اگەنتتىگىنە جامبىل وبلىسى پوليسيا دەپارتامەنتىنىڭ باسپا ءسوز قىزمەتى مالىمدەدى.

“اتالعان فاكتى بويىنشا قازاقستان رەسپۋبليكاسى قىلمىستىق كودەكسىنىڭ 293-بابى 1-بولىگىنە (بۇزاقىلىق) سايكەس سوتقا دەيىنگى تەرگەۋ امالدارى باستالدى. وقيعاعا قاتىسى بار تۇلعا انىقتالىپ، پوليسياعا جەتكىزىلدى. جابىرلەنۋشىگە مەديسينالىق كومەك كورسەتىلدى، الايدا ول اۋرۋحاناعا جاتۋدان باس تارتتى. قازىرگى ۋاقىتتا بۇل قىلمىستىق ءىس اياسىندا وقيعانىڭ ءمان-جايىن جان-جاقتى جانە وبەكتيۆتى انىقتاۋعا باعىتتالعان بارلىق قاجەتتى تەرگەۋ جانە جەدەل-ىزدەستىرۋ شارالارى جۇرگىزىلىپ جاتىر”، – دەلىنگەن پوليسيانىڭ رەسمي جاۋابىندا.

ايتا كەتەيىك، 2025 جىلدىڭ 13 مامىرى كۇنى ساعات 18:00 شاماسىندا تاراز قالاسىندا الماتى وبلىسى ىلە اۋداندىق ءماسليحاتىنىڭ دەپۋتاتى، زاڭگەر نۇرلان بايعازييەۆتىڭ اۋىر سوققىعا جىعىلعانى تۋرالى جازعان ەدىك.

Taraznews.kz مالىمەتىنشە، وقيعا تارازداعى “عيبرات” اتتى ءدامحانادا ورىن العان. دەپۋتات سول جەردە كليەنتتەرىمەن كەزدەسۋ وتكىزىپ جاتقاندا، بەلگىسىز بىرەۋ وعان تۇتقيىلدان شابۋىل جاساپ، تەمىر زاتقا ۇقساس قۇرالمەن بىرنەشە رەت ۇرعان. الدىن الا مالىمەت بويىنشا، نۇرلان بايعازييەۆ باس سۇيەگىنە زاقىم الىپ، ميى شايقالعان. قازىرگى ۋاقىتتا ول اۋرۋحانادا جاتىر، دارىگەرلەر ونى شۇعىل وتاعا دايىنداۋدا.

ەسكە سالايىق، بۇل شابۋىل بايعازييەۆتىڭ اتىشۋلى وقيعادان كەيىنگى ەكى اپتا ىشىندە ورىن الىپ وتىر. 28 ساۋىردە ول كامەلەتكە تولماعان 17 جاستاعى قىزدى توقتاتىپ، قىزمەتتىك كولىگىنە وتىرعىزباق بولعان يۋۆەنالدى پوليسيا قىزمەتكەرلەرىنىڭ ارەكەتىن ۆيدەوعا ءتۇسىرىپ العان. بايعازييەۆ ولاردىڭ زاڭعا قايشى ارەكەتىن اشكەرەلەگەن. بەينەجازبا الەۋمەتتىك جەلىلەردە كەڭىنەن تاراپ، قوعامدا ۇلكەن رەزونانس تۋدىردى. ارتىنشا قىزمەتتىك تەكسەرىس ناتيجەسىندە الگى پوليسەيلەر قىزمەتىنەن بوساتىلعان ەدى.