Taraz qalasyndaǵy №2 sotta qalalyq kópbeiindi aýrýhananyń bas dárigeriniń orynbasary men bas esepshisine qatysty qylmystyq is qaraldy. Olar alaiaqtyq áreketteri úshin kináli dep tanyldy, dep habarlaidy Dalanews.kz.
Vedomstvonyń baspasóz qyzmeti taratqan aqparatqa súiensek, atalǵan tulǵalar meditsinalyq mekemeniń 758 million teńgeden astam qarajatyn jymqyrǵan.
Sonymen qatar bas dárigerdiń orynbasary qylmystyq jolmen alynǵan qarajatty zańdastyryp, 4,4 million teńge kóleminde tabys tapqan. Sot ony birneshe qylmysty biriktire otyryp, kináli dep tanydy jáne 9 jylǵa bas bostandyǵynan aiyrý jazasyn taǵaiyndady. Sonymen qatar onyń múlki tárkilenip, 10 jyl boiy belgili bir laýazymdardy atqarý quqyǵynan aiyryldy.
Aýrýhananyń bas esepshisiniń de múlkin tárkilei otyryp, 6 jylǵa bas bostandyǵynan aiyrý jazasy kesildi. Ol da 10 jyl boiy memlekettik qyzmette jumys isteý quqyǵynan aiyryldy.
Aita keteiik, buǵan deiin de meditsina salasyndaǵy jemqorlyq derekteri jii tirkelgen bolatyn.
Ótken jyldyń tamyz aiynda Atyraý qalasyndaǵy №4 qalalyq emhananyń basshylyǵyna jáne kásipkerge qatysty sot úkimi shyqty. Olar qyzmet kórsetý boiynsha jalǵan kelisimsharttar arqyly 231,8 million teńge jymqyrdy dep aiyptalǵan.
Almatyda da qalalyq emhanalardyń býhgalterleri 341 million teńgeden astam biýdjet qarajatyn jymqyrǵany úshin sottalǵan.
Budan bólek, shilde aiynda Respýblikalyq dermatologiia ǵylymi ortalyǵynyń basshysy men orynbasary 5 million teńge kóleminde para aldy degen kúdikke ilingen. Bul soma meditsinalyq qyzmetkerlerdiń biliktiligin arttyrý qyzmetterine kelisimshart jasasý úshin berilgen delingen.
Sol kezderi elordalyq meditsinalyq ortalyq dárigeri Makisheva 500 myń teńge kóleminde para alǵany úshin sottalǵan. Bul somany ol bir patsientten josparly hirýrgiialyq operatsiia jasaý úshin alǵan.
Biyl qańtar aiynda Jambyl oblystyq onkologiia jáne hirýrgiia ortalyǵynyń direktory Aibaz Alihanovtyń para alǵany týraly aqparat áleýmettik jelide tarady. Belgili bolǵandai, 2023 jyly ol Taraz turǵynyn medbike qyzmetine ornalastyrǵany úshin 400 myń teńge alǵan degen kúdikke ilingen.
