Taqtaidai joldardyń úlesi 90%-dan artatyn bolady
Óńirde aldaǵy 5 jylda 2,3 myń shaqyrym jol salynyp, jóndeýden ótedi. Oblystyń áleýmettik-ekonomikalyq damýynyń 2021-2025 jyldarǵa arnalǵan Keshendi jospary aiasynda ońtústik-batys ainalma joly, Saryaǵash qalasyn ainalma joly, Túrkistannyń Shyǵys ainalma joly, sondai-aq Túrkistan-Shymkent-Tashkent júrdek temirjol magistrali salynady.
Túrkistan oblysynda jyl sońyna deiin jaqsy jáne qanaǵatty jaǵdaidaǵy oblystyq jáne aýdandyq mańyzy bar avtomobil joldarynyń úlesin 79%-dan 81,4%-ǵa arttyrý kózdelýde. Bul kórsetkishti 2025 jylǵa deiin 90%-ǵa arttyrý josparlanǵan. Biyl avtomobil joldaryn jóndeýge bólingen qarajattyń basym bóligi jergilikti mańyzy bar joldarǵa baǵyttalady. Qurylys-jóndeý jumystarymen jalpy 300-den astam nysan, ne 1200 shaqyrymǵa jýyq joldar men kósheler qamtylǵan. Jyl sońyna deiin 700 shq. jol paidanalýǵa beriledi.
Maqtaaral, Jetisai, Keles aýdandary aýmaǵynda uzyndyǵy 478 shq. joldar kúrdeli jáne ortasha jóndeýden ótkizilýde. Odan bólek, osy aýdandarda oblys ákiminiń tapsyrmasymen jalpy uzyndyǵy 180 shq. asatyn
11 oblystyq mańyzy bar avtomobil joldary jóndeýden ótkizilýde. Bul joldardy qyrkúiek aiynda tolyqtai paidalanýǵa berý josparlanýda. Joldar Qazyǵurt, Túlkibas, Sozaq, Báidibek aýdandary men Arys qalasynda da júrgizilip jatyr.
Biyl Túrkistan-Baltakól, Kentaý-Ashysai, Shymkent-Qaramurt, Aqsýkent-Qaramurt, Shymkent-Sairam, Sharaphana-Jańabazar baǵyttaryndaǵy joldardy paidalanýǵa berý jáne Maqtaaral, Jetisai, Keles aýdandaryndaǵy oblystyq mańyzy bar avtomobil joldaryn jóndeý jumystary aiaqtalady.
Túrkistan - Baltakól, Túrkistan-Qarnaq-Kentaý baǵyttarynda 80 shq. avtomobil joldary kúrdeli jáne ortasha jóndeýden ótkizilip, jyl sońyna deiin paidalanýǵa beriledi. Sonymen qatar, Túrkistan-Qarnaq-Kentaý, Kentaý-Ashysai baǵyttaryndaǵy 53,7 shq. joldardy ortasha jóndeýge tiisti qarjy qaraldy. Shardara-Arys baǵytyndaǵy jalpy uzyndyǵy 41 shq joldyń kúrdeli jóndeý jumystary tamyz aiynda tolyǵymen aiaqtalatyn bolady. Aqsýkent-Qaramurt, Shymkent-Sairam, Shymkent-Kóksáiek baǵyttaryndaǵy 50 shq. kúre joldar qaita qurý, kúrdeli jáne ortasha jóndeýden ótkizilýde. Jańarǵan joldar qyrkúiek aiyna deiin ashylady.
Otyrar aýdanynyń Sháýildir-Kóksarai-Baiyrqum jáne Otyrar qalashyǵy baǵyttarynda 42 shq. joldy ortasha jóndeýge tiisti qarjy qaraldy, nysandar kelesi jylǵa ótpeli. Ordabasy aýdanynyń Temirlan-Qyzylseńgir, Qainar-Uialyjar, Badam-Shubar baǵyttaryndaǵy 68,4 shq quraityn joldarǵa ortasha jóndeý jumystary bastalatyn bolady. Nysandar kelesi jylǵa ótpeli.
