Tanymal ǵalym Ábsattar qajy Derbisáli ómirden ótti
Bul jaiynda búgin Aqparat jáne qoǵamdyq damý ministri Aida Balaeva málim etti.
«Belgili dintanýshy, shyǵystanýshy, islamtanýshy ǵalym, Ábsattar qajy Derbisáliniń ómirden ozýyna bailanysty marqumnyń otbasy men jaqyn-týǵandarynyń qaiǵylaryna ortaqtasyp kóńil aitamyn.
Bul búkil qazaq rýhaniiatyna ortaq aýyr qaiǵy. Ábsattar Baǵysbaiuly búkil sanaly ǵumyryn imandylyqqa arnap, asyl dinimizdiń týra jolyn halyqqa durys jetkizý isine ólsheýsiz eńbek sińirdi.
Elimizdiń Bas múftii laýazymynda júrgen ýaqytta qajy aǵamyzben qyzmet barysynda jolyǵysyp turdyq. Qai kezde de óziniń keń minezimen, tereń bilimimen, parasatty bolmysymen rýhaniiat biiginen kórinip, elimizdegi ultaralyq kelisim men dinaralyq tatýlyqtyń órken jaiýyna ólsheýsiz úles qosqan jan edi.
Ábsattar qajy aǵamyzdyń ziialy bolmysy, eline sińirgen eńbegi, jazǵan rýhani shyǵarmalary, jamaǵatty iman jolyna shaqyrýda aitqan aqyl sózderi – eshqashan tozbas rýhani qazyna bolyp halqynyń jadynda máńgilik saqtalady. Marqumnyń jatqan jeri jaryq, topyraǵy torqa bolyp, nury peiishte shalqysyn», – dep jazdy ministr Instagram paraqshasynda.
Buǵan deiin Qazaqstannyń bas múftii bolǵan Ábsattar qajy Derbisáliniń aýyr jaǵdaida jansaqtaý bólimine túskeni habarlanǵan edi.
Aita ketsek, Ábsattar Baǵysbaiuly Derbisáli (15 qyrkúiek 1947 jyly týǵan, Túrkistan oblysy Túlkibas aýdany) – shyǵystanýshy, dintanýshy, ádebiet zertteýshi, jazýshy, synshy, filologiia ǵylymdarynyń doktory, 1-synypty keńesshi, diplomatiialyq laýazym iesi.
Dalanews.kz redaktsiiasy marqumnyń otbasy men týystaryna, baýyrlary men shákirtterine qaiǵyryp kóńil aitady.
