Árine, onyń kósilgisi kelgen klerktiń qyzmetine men baǵa berýden aýlaqpyn. Shynymen de qabiletti uiymdastyrýshy ári ózi aityp ótkendei adal da el aldynda abyroily azamat shyǵar.
Kózben kórmegesin, qolynan tap basyp ustamaǵan soń sheneýniktiń bárin birdei paraqor dep aita almaimyz ǵoi.
Biraq ásheiinde sabyrlyq saqtaityn meni ashýlandyryp, zyǵyrdanymdy qai-natqan jáit – basqa jáit.
Manaǵy basshysymaq jarty saǵat boiyna qazaq tilinde sóileýge tyrysyp, tipti mazany ketirdi.
Birinshiden, kibirtiktep ári ejiktep eki aýyz sózdiń basyn qosa almai sharshady, terlep-tepshidi-aý, bátshaǵar.
Ekinshiden, ózi ǵana qinalyp qoimai, sózdiń qadirin biletin tutas jurtty qinady-aý! Óz basym rabaida taǵy da ne búldirip qoiar eken dep qipalaqtaýmen boldym, Janym oǵan emes, tilimizge ashydy ǵoi! Nátijesinde onyń ne aityp, ne qoiǵanyn eshkim de uǵa almady (ózi de asa uǵa qoiǵan joq-aý osy).
Osydan kim ne utty?
Qanshama kúsh salyp, teledidarǵa shyqqan shalatildi sheneýnik ne utty? Keshqurym kógildir ekran aldynda qazaq tilinde áleýmettik mańyzy bar habar kórmek bolǵan qadirmendi kórermen ne utty?
Óziniń bir ókilin dúiim jurttyń aldyna shyǵaryp, halyq aldynda esep bergizgisi kelgen óz tiline ógei Úkimet ne ýtty?
Nátije bireý – eshkim de utqan joq!
Tilge talapsyz telegeroi da, jaqsylyqqa jany jaqyn jurt ta, bárin belden basqan bilik te!
Kerisinshe, tikelei efirde tárk etilgen tilimiz utyldy sol kúni!
Talaptyǵa nur jaýar deidi qazaq. Múmkin, sheneýniktiń óz tilimde sóileimin degen nietine qoldaý kórsetý de kerek shyǵar. Biraq qazaqta taǵy da bir sóz bar «Artyq qylam dep tirtyq qyldy» deidi.
Aǵylshyn nemese orys tilinde mińgirlep turǵan adamdy ulttyq telearnaǵa jarty saǵattyq habarǵa shyǵarar ma edi?
Osynshama altyndai ýaqytty aitpaǵanda, bir sekýndqa da mańaiyna jolatpas edi!
Al bizde bolsa ony ekranǵa jibergen telearna basshylyǵy da tynysh, kúnde qaitalanyp jatqan osyndai masqaraǵa kózjumbailyqpen qarap otyrǵan qaptaǵan til patriottary da tynysh!
Menińshe, ana tilimizdiń abyroiyn airandai tógetin osyndai oirandarǵa jol bermeý úshin bir nárseni jedel qolǵa alý kerek.
Iaǵni, óz aǵaiynymyzdyń ishinen shyqqan tilge shorqaq sheneýnikke ne basqa da talapkerge – qazaq tilin jetik meńgermese teleekranǵa shyǵýǵa tyiym salý qajet!
Tanymal bolǵysy kelse, karera jasaǵysy kelse, tildi úirensin!
Osy oraida ózimniń bir tanysym týraly aitsam. Bedeldi batys memleketiniń Qazaqstandaǵy elshiliginde jumys istegen bir diplomat bir-eki jyldyń ishinde qazaq tilin áp-ádemi-aq igerip alǵan bolatyn.
Pretsedent degen uǵym bar, aǵaiyn!
Ámirjan QOSANOV,
saiasatker
