2021 jyldyń 28 sáýirinde alaiaqtyq jasady degen kúdikke ilinip ustalǵan Almaty qalasy Medeý aýdandyq sotynyń sýdiasy Svetlana Jolmanova shuǵyl úndeý jasady, dep habarlaidy Dalanews.kz Nege.kz-ke siltep.
Svetlana Jolmanovanyń shashyn tyqyrlap alyp tastaǵan, burynǵy sýdiany birden tani qoiý qiyn.
«Qamaýda otyrǵanyma eki ai boldy. Meniń hattaryma eshkim jaýap berer emes. Telefon soǵýǵa múmkindik bermeidi, balalarymdy da kórsetpeidi. Qazir dúnie-múlkimdi tartyp alyp jatyr. Men bárine daiynmyn, bul – baryp turǵan bassyzdyq. Men ólýge de daiynmyn, ózime qol jumsaýǵa daiynmyn, óitkeni meniń balalarym men kári sheshem zardap shegip jatyr», – deidi ol Prezidentke baǵyttaǵan úndeýinde.
Burynǵy sýdianyń aitýynsha, qylmystyq isti UQK tergegen kezde ol eshqaida ketpei týraly qolhat bermese de, eki jarym jyl boiy Almaty qalasynan shyǵa almapty.
«Osy videoǵa nazar aýdarýlaryńyzdy suraimyn. Bul zańsyzdyqty bálkim ólim toqtatatyn shyǵar. Eger qandai da bir jaǵdai bolsa, meniń ólimime Smaiylovty kináli dep tanýdy suraimyn», – depti Svetlana Jolmanova.
Eske salaiyq, 9 qazanda buryn alaiaqtyq jasady degen sýdia Svetlana Jolmanova qaitadan ustalǵan bolatyn.
Bul aqparatty Almaty qalalyq Politsiia departamenti aqparatty rastady.
"Medeý aýdandyq politsiia Basqarmasy alaiaqtyq deregi boiynsha qylmystyq is qozǵady. Kúdikti politsiiaǵa jetkizildi. Tergeý sharalary júrgizilip jatyr", – dedi Almaty qalasy Politsiia departamentiniń resmi ókili Saltanat Ázirbek.
Aita keteiik, 2021 jyldyń 28 sáýirinde Almaty qalasy Medeý aýdandyq sotynyń sýdiasy Svetlana Jolmanova alaiaqtyq jasady degen kúdikke ilindi.
Tintý kezinde sýdianyń kabinetinen 10 myń dollar tárkilengen. Ol sot sheshimderin belgili bir adamdardyń paidasyna shyǵarýǵa kómektesken.
29 sáýirde Joǵarǵy sot tóraǵasynyń ókimimen Svetlana Jolmanovanyń ókilettigi toqtatyldy.
