2021 جىلدىڭ 28 ساۋىرىندە الاياقتىق جاسادى دەگەن كۇدىككە ءىلىنىپ ۇستالعان الماتى قالاسى مەدەۋ اۋداندىق سوتىنىڭ سۋدياسى سۆەتلانا جولمانوۆا شۇعىل ۇندەۋ جاسادى، دەپ حابارلايدى Dalanews.kz Nege.kz-كە سىلتەپ. 

سۆەتلانا جولمانوۆانىڭ شاشىن تىقىرلاپ الىپ تاستاعان، بۇرىنعى سۋديانى بىردەن تاني قويۋ قيىن.

«قاماۋدا وتىرعانىما ەكى اي بولدى. مەنىڭ حاتتارىما ەشكىم جاۋاپ بەرەر ەمەس. تەلەفون سوعۋعا مۇمكىندىك بەرمەيدى، بالالارىمدى دا كورسەتپەيدى. ءقازىر دۇنيە-مۇلكىمدى تارتىپ الىپ جاتىر. مەن بارىنە دايىنمىن، بۇل – بارىپ تۇرعان باسسىزدىق. مەن ولۋگە دە دايىنمىن، وزىمە قول جۇمساۋعا دايىنمىن، ويتكەنى مەنىڭ بالالارىم مەن كارى شەشەم زارداپ شەگىپ جاتىر»، – دەيدى ول پرەزيدەنتكە باعىتتاعان ۇندەۋىندە.

بۇرىنعى سۋديانىڭ ايتۋىنشا، قىلمىستىق ءىستى ۇقك تەرگەگەن كەزدە ول ەشقايدا كەتپەي تۋرالى قولحات بەرمەسە دە، ەكى جارىم جىل بويى الماتى قالاسىنان شىعا الماپتى.

«وسى ۆيدەوعا نازار اۋدارۋلارىڭىزدى سۇرايمىن. بۇل زاڭسىزدىقتى بالكىم ءولىم توقتاتاتىن شىعار. ەگەر قانداي دا ءبىر جاعداي بولسا، مەنىڭ ولىمىمە سمايىلوۆتى كىنالى دەپ تانۋدى سۇرايمىن»، – دەپتى سۆەتلانا جولمانوۆا.

ەسكە سالايىق، 9 قازاندا بۇرىن الاياقتىق جاسادى دەگەن سۋديا سۆەتلانا جولمانوۆا قايتادان ۇستالعان بولاتىن.

بۇل اقپاراتتى الماتى قالالىق پوليسيا دەپارتامەنتى اقپاراتتى راستادى.

"مەدەۋ اۋداندىق پوليسيا باسقارماسى الاياقتىق دەرەگى بويىنشا قىلمىستىق ءىس قوزعادى. كۇدىكتى پوليسياعا جەتكىزىلدى. تەرگەۋ شارالارى جۇرگىزىلىپ جاتىر"، – دەدى الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەك.

ايتا كەتەيىك، 2021 جىلدىڭ 28 ساۋىرىندە الماتى قالاسى مەدەۋ اۋداندىق سوتىنىڭ سۋدياسى سۆەتلانا جولمانوۆا الاياقتىق جاسادى دەگەن كۇدىككە ءىلىندى.

ءتىنتۋ كەزىندە سۋديانىڭ كابينەتىنەن 10 مىڭ دوللار تاركىلەنگەن. ول سوت شەشىمدەرىن بەلگىلى ءبىر ادامداردىڭ پايداسىنا شىعارۋعا كومەكتەسكەن.

29 ساۋىردە جوعارعى سوت ءتوراعاسىنىڭ وكىمىمەن سۆەتلانا جولمانوۆانىڭ وكىلەتتىگى توقتاتىلدى.