«Tańbaly tastar – babalar izimen» ekspeditsiiasy ótti
Memleket basshysynyń "Bolashaqqa baǵdar: rýhani jańǵyrý" baǵdarlamalyq maqalasy aiasynda Túrkistan oblysynda "Tańbaly tastar – babalar izimen" atty ekspeditsiia uiymdastyryldy.
Jobanyń maqsaty – Qazaqstannyń kieli jerlerine engen óńirdegi 24 nysandy tanystyrý ári kieli óńirdiń bai tarihy men tańbaly tastaryn nasihattaý. Sonymen qatar, óńirge keletin qonaqtar úshin jańa týristik baǵyttardy qalyptastyrý.
Túrkistan oblysy ishki saiasat basqarmasynyń uiytqy bolýymen ótken týr Báidibek, Sozaq aýdandary men Kentaý qalasyn qamtydy. Atap aitqanda, eki kúnge sozylǵan ekspeditsiia barysynda jobaǵa qatysýshylar Báidibek aýdanyndaǵy Boraldai petroglifteri men Aqmeshit úńgirine, Sozaq aýdanyndaǵy Ysqaq bab kesenesi men Arpaózen petroglifterine, Sozaq kóne qalasy men Qarabýra kesenesine, sondai-aq Kentaý qalalyq ólketaný mýzeii baǵyttary boiynsha tarihi jerlerdi aralady.
Jergilikti ólketanýshylardyń aitýynsha, Túrkistan oblysynda 3 myńnan asa petroglifter bar. Basym kópshiligi Saq dáýiriniń jádigerleri. Tastaǵy tańbalarda kóbine kóshpelilerdiń turmys-salty beinelengen.
Mundai ekspeditsiialardyń uiymdastyrylýy babalardan qalǵan tarihi baǵa jetpes muralardy kózdiń qarashyǵyndai saqtap, keiingi urpaqqa jetkizýge zor múmkindik bermek.
Túrkistan oblysy ákiminiń baspasóz qyzmeti
