Aýǵanstannyń Gerat provintsiiasyndaǵy Taliban ákimshiligi áielderdiń kiim kiiý erejelerin qaitadan qataityp, barlyq áiel-muǵalimderge parandja kiiýdi mindettedi jáne parandjasyz taksi qyzmetin paidalanýǵa tyiym saldy dep habarlaidy Dalanews.kz.
Atlas Press málimetinshe, talibter taǵaiyndaǵan Gerat gýbernatory bul jarlyqty ótken aptada resmi jiynda jariialaǵan. Osy jarlyqqa sáikes, eshbir áiel-muǵalim parandjasyz mektepke kire almaidy.
Amu TV telearnasynyń dereginshe, bul shekteýler tek mektepterge ǵana emes, basqa mekemelerge de qatysty. Sońǵy birneshe kún ishinde parandjasyz áielderge aýrýhana, ortalyq túrme, bilim departamenti jáne tipti bankter siiaqty oryndarǵa kirýge ruqsat berilmegeni habarlandy.
Talibter qabyldaǵan bul sharalar azamattyq qoǵam uiymdary men áielderdiń quqyqtaryn qorǵaýshylardyń tarapynan synǵa ushyrady. «Aýǵan áielderiniń tarihyn ózgertý qozǵalysy» óz málimdemesinde bul sheshimdi «áielderdiń quqyqtary men qadir-qasietin aiqyn, turaqty jáne júieli túrde buzý» dep atap, bul shekteýshi saiasatty dereý toqtatýǵa shaqyrdy.
Alaida Kabul Now basylymynyń habarlaýynsha, munymen shekteýler aiaqtalǵan joq. Taliban biligi taksi júrgizýshilerine parandja kimegen áielderdi tasýǵa tyiym saldy.
Jergilikti derekkózderdiń aitýynsha, Taliban kúshteri Gerat qalasynyń ár jerinde birneshe baqylaý-ótkizý beketterin ornatyp, taksilerdi tekserip, denesi men bet-júzin tolyq jabatyn dástúrli kiim kimegen áielderdi tasymaldaǵan júrgizýshilerdi jazalap jatyr.
