12 maýsymda tańerteń Tatarstan aýmaǵyndaǵy birneshe nysanǵa dron shabýyly jasaldy. Nysandardyń qatarynda óńirdegi negizgi kásiporyndardyń biri "Nijnekamskneftehim" kesheni de bar, dep habarlaidy dalanews.kz.
BAQ-ta jariialanǵan videolarǵa qaraǵanda, kásiporyn aýmaǵynda órt shyqqan.
Tatarstan basshysy Rýstam Minnihanov shabýylǵa ushyraǵan nysandarda zardaptardy joiý jumystary júrgizilip jatqanyn, óndiris toqtatylmaǵanyn málimdedi.
Sonymen qatar, onyń aitýynsha, drondardyń biri turǵyn úige túsken. Saldarynan úsh adam zardap shekken. Turǵyndar qaýipsiz jerge kóshirilgen.
Oqiǵadan keiin Nijnekamsk pen Qazan áýejailarynda ushaqtardy qabyldaý jáne jóneltýge ýaqytsha shekteýler engizildi.
Keiin Samara oblysyndaǵy "Toliattikaýchýk" himiia zaýytyna da drondar shabýyl jasaǵany habarlandy.
