Marqum Sherzat pen onyń otbasyna shabýyl jasaǵan eki jigit buǵan deiin de uryp-soǵý faktileri boiynsha jaýapqa tartylǵan, dep habarlaidy Dalanews.kz.
Sot derekterine súiensek, azamat A. jáne onyń dosy buǵan deiin de buzaqylyq áreketteri úshin jaýapqa tartylǵan. Ótken jyldyń kúzinde azamat N. ekeýi janarmai beketinde beitanys jigitke shabýyl jasap, ortasha dárejedegi jaraqat salǵan. Alaida sotta eki tarap tatýlasyp, isti jyly japqan.
Azamat N. bolsa, qazirgi ýaqytta tóbeles úshin shartty túrde bas bostandyǵynan aiyrylǵan. Onyń buǵan deiin adamdarǵa tórt márte shabýyl jasaǵany belgili boldy. Biraq jábirlenýshiler oǵan belgisiz sebeptermen keshirim berip, tatýlasýǵa kelisken.
Holanews.kz agenttigi osyǵan qatysty sot derekterin bólisti.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Resmi aqparatqa súiensek, barlyq kináli adam ustalyp, ýaqytsha ustaý izoliatoryna qamaýǵa alynǵan.
“Qylmystyq isti tergeý Ishki ister ministrliginiń erekshe baqylaýyna alynyp, onyń nusqaýy boiynsha arnaiy jedel-tergeý top jumys atqarýda. Barlyq jinalǵan dálelder, sonyń ishinde beinebaqylaý kameralarynan alynǵan jazbalar zerttelýde. Qazirgi ýaqytta jeti adamnyń qylmys jasaýǵa qatysy bar ekeni anyqtaldy”, - deidi Almaty oblysynyń politsiia departamenti.
Málimetke sáikes, jábirlenýshi taraptyń dálelderi boiynsha basqa tulǵalardyń qatysyn anyqtaý úshin tergeý sheńberinde tekserý júrgizilýde.
“Árqaisyna jeke quqyqtyq baǵa beriletin bolady. Qaitys bolǵan jasóspirimniń zańdy ókilderi tergeý barysy týraly habarlanyp jatyr. Tergeý múddesi úshin ózge de aqparat jariia etýge jatpaidy”, - dep málimdedi politsiia ókilderi.
Eske salaiyq, buǵan deiin Ishki ister ministri Erjan Sádenov oqiǵaǵa qatysty pikir bildirgen edi.
“Almaty oblysynyń Talǵar aýdanynda oryn alǵan kámeletke tolmaǵan balanyń ólimine qatysty mán-jailar meniń jeke baqylaýymda. Oqiǵa ornynda birinshi orynbasarymnyń basshylyǵymen IIM qyzmetkerlerinen quralǵan top jumys isteýde. Kináliler tiisti jazasyn alady”, - dedi ol.
