Marqum Sherzat Bolattyń otbasynyń qorǵaýshysy Saida Táýekelova Talǵardaǵy tragediiadan keiin kýáger retinde tirkelgen eki qyzǵa qatysty pikir bildirdi, dep habarlaidy Dalanews.kz.
Onyń sózinshe, ekeýiniń áreketine qylmystyq-protsesýaldyq baǵa berilýi tiis.
“Qazir tergeý júrgizilip jatyr. 30 qazan kúni Almaty oblysy prokýratýrasyna tergeý áreketine tekserý júrgizý týraly shaǵym jiberip, birneshe suraq joldadyq. Sondai-aq negizgi argýmentterdi de qostyq. Biz eki qyzdyń áreketin QR QK 434-baby (Qylmys týraly habarlamaý) boiynsha qylmysqa qatysy bar dep sanaimyz. Zańǵa sáikes, bul aýyr qylmys bolyp esepteledi. Olardyń áreketin atalǵan qylmystyq is boiynsha qaita qaraýdy talap etemiz”, - dedi zańger justice_for_sherzat paraqshasynda ótken tikelei efirde.
Olardyń shaǵymyna prokýratýra keri bailanys bergen.
“Prokýratýradan 11 qarasha kúni jaýap keldi. Ol jerde is boiynsha tergeý jalǵasyp jatqany, shaǵymǵa bailanysty tergeý organyna tiisti nusqaý berilgeni, jinalǵan derekter negizinde protsesýaldyq sheshim qabyldanatyny aitylǵan. Bul jaýapqa bizdiń kóńilimiz tolmady.Biz tergeý jumysynyń ádil júrgiziletinine senim artamyz. Sondai-aq talabymyz eskerilip, qyzdar tiisti tergeý statýsyn alady dep úmittenemiz”, - dep qosty ol.
Aita keteiik, buǵan deiin jábirlenýshi taraptyń qorǵaýshysy Maral Jailaýbaeva qandy oqiǵa bolǵan túni kúdiktiler marqum Sherzattyń aǵasy Nurqanatty da óltirýge oqtalǵanyn jetkizgen edi.
Onyń sózinshe, qazirgi tańda qylmystyq is 6 bap boiynsha tergelip jatyr.
“Búginde Sherzat Bolattyń isi boiynsha kóptegen suraq kelýde. Osy qylmystyń mán-jaiy týraly aita keteiin. Qylmystyq is 6 bap boiynsha tergelýde. Óltirý faktisi, qylmysty jasyrý, qylmysty habarlamalaý jáne qorqytý men buzaqylyq boiynsha. Sonymen qatar qaiǵyly oqiǵa túni Sherzattyń aǵasy Nurqanattyń uialy telefony men ámiiany urlanǵan. Bul boiynsha biz tergeý organdaryna ótinish hat jiberdik. Ótinish hat qazirgi tańda qanaǵattandyrlyp, QR QK 188- baby (Bóten múlikti urlaý faktisi boiynsha) qylmystyq is qozǵaldy”, - dedi ol.
Sondai-aq tóbeles kezinde kúdiktiler Sherzat Bolattyń aǵasy Nurqanatty da óltirmek bolǵan.
“Biz Nurqanatty óltirýge oqtalý faktisi boiynsha tergeý organdaryna ótinish jiberdik. Kúdiktiler Nurqanatqa dene jaraqattaryn keltirip, 3-4 márte jambasy men tósine pyshaq suqqan. Atalǵan áreketter adamdy ómirinen aiyrýǵa tikelei baǵyttalǵan, iaǵni naqty nietpen jasalǵan dep esepteimiz. Bul ótinish qazir tergeý organdarymen qaralýda. Qylmystyq is boiynsha jábirlenýshiler men kúdiktilerdiń ortasynda bettestirý ótkizilip, qazirgi tańda qazirgi tańda taǵaiyndalǵan saraptamalardyń qorytyndylarymen biz tanysýdamyz”, - deidi ol.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
15 qazanda Ishki ister vitse-ministri taǵy úsh kúdiktini ustaǵanyn málim etti.
Al 18 qazanda taǵy bir kúdiktini qolǵa túsirdi.
Sonymen qatar, Almaty oblystyq politsiia departamenti bastyǵynyń mindetin atqarýshy Shalqarov tóbelesten keiin qansha qarý tárkilengenin aitty.
Odan keiin Sherzattyń úiine kúzet qoiyldy.
Kóp uzamai marqum Sherzattyń úii órtendi.
