Talǵarda 16 jastaǵy jasóspirimniń ata-anasynyń kóz aldynda qatygezdikpen ajal qushýy qoǵamnyń ashýyn týdyryp, Almaty oblysyndaǵy qylmystyq jazanyń aqsap turǵanyn aiqyndai tústi. Bul týraly “El Daýysy” QQ jetekshisi Aida Jeksenova málim etti, dep habarlaidy Dalanews.kz.
Qoǵam belsendisi búkil oblys aýmaǵynda qylmystyq toptar erkin áreket etip, jazadan jaltaryp, jergilikti turǵyndardy úreilendirip otyrǵanyn alǵa tartty. Aitýynsha, másele tárbiede nemese internettiń áserinde emes, qylmystardy elemeitin, tek qaiǵyly oqiǵa bolǵanda ǵana áreket etetin quqyq qorǵaý organdarynyń álsiz ári mardymsyz jumysynda.
Osy tusta ol Ishki ister ministrliginen Almaty oblysynda áreket etetin qylmystyq toptardy áshkerelep, óz júiesinde tártip ornatýdy talap etti.
Eske salaiyq, Talǵarda 16 jastaǵy jasóspirim 4 qazanǵa qaraǵan túni kóz jumdy. Sýyq qarý asynǵan bir top jigit marqum Sherzatqa, onyń aǵasy men ákesine shabýyl jasaǵan.
Sherzattyń ákesi jalǵa dúken alyp, saýda jasaýmen ainalysatyn. Arty ólimmen aiaqtalǵan tóbeles osy dúkennen bastalǵan.
Bir jigit dúkenge kelip, bir quty syra alyp, aqshasyn tólemei kete barǵan. Sherzattyń ákesi syranyń aqshasyn tóleýdi talap etken kezde janjal týyndaǵan.
Sherzat osy sátte klienttiń dúkennen shyǵyp ketýin suraǵan. Biraq syra alǵan jigit dostaryna qońyraý soǵyp, dúkenge úsh kólikpen bir top jigit kelgen.
Bir top jigit Sherzatty tepkilei bastaǵan. Bul sátti turǵyndar videoǵa túsirip alǵan. 10-shy synypta oqityn Sherzat ata-anasynyń dúkenine kezdeisoq kelgen. Sýyq qarýmen kelgen buzaqylar eshkimdi aiamapty. Qansyraǵan bir otbasynyń músheleri aýrýhanaǵa jetkizilgen. Kóp uzamai Sherzat jansaqtaý bóliminde kóz jumǵan.
Osy tusta marqumnyń ápkesi Baqyt Reimova politseiler tóbeleske qatysýshylardyń bárin áli qamaýǵa almaǵanyn aitady. Ol quzyrly organdardan kúdiktilerdiń bárin ustap, kórsetýin talap etip otyr.
"Eger rezonans jasamasaq, bizdi eshkim estimeidi. Inim áskeri qyzmetker bolǵysy keldi. Qanshama armandary ishinde ózimen birge ketti. Sondai ókinishti jaǵdai. Bulai bolmaýy kerek edi", - deidi Baqyt Reimova.
Onyń aitýynsha, Sherzatty kúdiktiler aiýandyqpen óltirgen. Qansyrap jatqanynda kúdiktilerdiń bireýi artynan kelip, avtomatpen urǵan eken.
"Máiitti óz kózimmen kórdim. Balanyń basy qaq aiyrylyp ketken. 30-ǵa kelgen erkekter 16-daǵy jasóspirimge jabylǵan. Ákesin sabap, baýyrymdy úsh jerden pyshaqtap ketken. Bir syra bermegeni úshin óldi. Masqara ǵoi. Ákesine qorǵan bolǵany úshin óltirip ketti. Endi olardy nege shyǵaryp jiberedi? Ádildik qaida? Qai memlekette ómir súrip jatyrmyz? Osylai bizdiń balalarymyz ólip kete bere me? Bul ne degen sumdyq?", - deidi marqumnyń ápkesi.
Sherzattyń týystary keminde 13 kúdikti baryn aitady. Alaida politsiia 7 adamdy ǵana ustapty. Oqiǵa ornynda bolǵan Sherzattyń ákesi de málimdeme jasady. Ol ádil sot talap etti.
Oqiǵa Ishki ister ministri Erjan Sádenov pen Almaty oblysynyń prokýratýrasy pikir bildirdi.
“Almaty oblysynyń Talǵar aýdanynda oryn alǵan kámeletke tolmaǵan balanyń ólimine qatysty mán-jailar meniń jeke baqylaýymda. Oqiǵa ornynda birinshi orynbasarymnyń basshylyǵymen IIM qyzmetkerlerinen quralǵan top jumys isteýde. Kináliler tiisti jazasyn alady”, - dedi ol.
