تالعاردا 16 جاستاعى ءجاسوسپىرىمنىڭ اتا-اناسىنىڭ كوز الدىندا قاتىگەزدىكپەن اجال قۇشۋى قوعامنىڭ اشۋىن تۋدىرىپ، الماتى وبلىسىنداعى قىلمىستىق جازانىڭ اقساپ تۇرعانىن ايقىنداي ءتۇستى. بۇل تۋرالى “ەل داۋىسى” قق جەتەكشىسى ايدا جەكسەنوۆا ءمالىم ەتتى، دەپ حابارلايدى Dalanews.kz.

قوعام بەلسەندىسى بۇكىل وبلىس اۋماعىندا قىلمىستىق توپتار ەركىن ارەكەت ەتىپ، جازادان جالتارىپ، جەرگىلىكتى تۇرعىنداردى ۇرەيلەندىرىپ وتىرعانىن العا تارتتى. ايتۋىنشا، ماسەلە تاربيەدە نەمەسە ينتەرنەتتىڭ اسەرىندە ەمەس، قىلمىستاردى ەلەمەيتىن، تەك قايعىلى وقيعا بولعاندا عانا ارەكەت ەتەتىن قۇقىق قورعاۋ ورگاندارىنىڭ ءالسىز ءارى ماردىمسىز جۇمىسىندا.

وسى تۇستا ول ىشكى ىستەر مينيسترلىگىنەن الماتى وبلىسىندا ارەكەت ەتەتىن قىلمىستىق توپتاردى اشكەرەلەپ، ءوز جۇيەسىندە ءتارتىپ ورناتۋدى تالاپ ەتتى.

ەسكە سالايىق، تالعاردا 16 جاستاعى ءجاسوسپىرىم 4 قازانعا قاراعان ءتۇنى كوز جۇمدى. سۋىق قارۋ اسىنعان ءبىر توپ جىگىت مارقۇم شەرزاتقا، ونىڭ اعاسى مەن اكەسىنە شابۋىل جاساعان.

شەرزاتتىڭ اكەسى جالعا دۇكەن الىپ، ساۋدا جاساۋمەن اينالىساتىن. ارتى ولىممەن اياقتالعان توبەلەس وسى دۇكەننەن باستالعان.

ءبىر جىگىت دۇكەنگە كەلىپ، ءبىر قۇتى سىرا الىپ، اقشاسىن تولەمەي كەتە بارعان. شەرزاتتىڭ اكەسى سىرانىڭ اقشاسىن تولەۋدى تالاپ ەتكەن كەزدە جانجال تۋىنداعان.

شەرزات وسى ساتتە كليەنتتىڭ دۇكەننەن شىعىپ كەتۋىن سۇراعان. ءبىراق سىرا العان جىگىت دوستارىنا قوڭىراۋ سوعىپ، دۇكەنگە ءۇش كولىكپەن ءبىر توپ جىگىت كەلگەن. 

ءبىر توپ جىگىت شەرزاتتى تەپكىلەي باستاعان. بۇل ءساتتى تۇرعىندار ۆيدەوعا ءتۇسىرىپ العان. 10-شى سىنىپتا وقيتىن شەرزات اتا-اناسىنىڭ دۇكەنىنە كەزدەيسوق كەلگەن. سۋىق قارۋمەن كەلگەن بۇزاقىلار ەشكىمدى اياماپتى. قانسىراعان ءبىر وتباسىنىڭ مۇشەلەرى اۋرۋحاناعا جەتكىزىلگەن. كوپ ۇزاماي شەرزات جانساقتاۋ بولىمىندە كوز جۇمعان.

وسى تۇستا مارقۇمنىڭ اپكەسى باقىت رەيموۆا پوليسەيلەر توبەلەسكە قاتىسۋشىلاردىڭ ءبارىن ءالى قاماۋعا الماعانىن ايتادى. ول قۇزىرلى ورگانداردان كۇدىكتىلەردىڭ ءبارىن ۇستاپ، كورسەتۋىن تالاپ ەتىپ وتىر.

"ەگەر رەزونانس جاساماساق، ءبىزدى ەشكىم ەستىمەيدى. ءىنىم اسكەري قىزمەتكەر بولعىسى كەلدى. قانشاما ارماندارى ىشىندە وزىمەن بىرگە كەتتى. سونداي وكىنىشتى جاعداي. بۇلاي بولماۋى كەرەك ەدى"، - دەيدى باقىت رەيموۆا.

ونىڭ ايتۋىنشا، شەرزاتتى كۇدىكتىلەر ايۋاندىقپەن ولتىرگەن. قانسىراپ جاتقانىندا كۇدىكتىلەردىڭ بىرەۋى ارتىنان كەلىپ، اۆتوماتپەن ۇرعان ەكەن. 

"ءمايىتتى ءوز كوزىممەن كوردىم. بالانىڭ باسى قاق ايىرىلىپ كەتكەن. 30-عا كەلگەن ەركەكتەر 16-داعى جاسوسپىرىمگە جابىلعان. اكەسىن ساباپ، باۋىرىمدى ءۇش جەردەن پىشاقتاپ كەتكەن. ءبىر سىرا بەرمەگەنى ءۇشىن ءولدى. ماسقارا عوي. اكەسىنە قورعان بولعانى ءۇشىن ءولتىرىپ كەتتى. ەندى ولاردى نەگە شىعارىپ جىبەرەدى؟ ادىلدىك قايدا؟ قاي مەملەكەتتە ءومىر ءسۇرىپ جاتىرمىز؟ وسىلاي ءبىزدىڭ بالالارىمىز ءولىپ كەتە بەرە مە؟ بۇل نە دەگەن سۇمدىق؟"، - دەيدى مارقۇمنىڭ اپكەسى.

شەرزاتتىڭ تۋىستارى كەمىندە 13 كۇدىكتى بارىن ايتادى. الايدا پوليسيا 7 ادامدى عانا ۇستاپتى. وقيعا ورنىندا بولعان شەرزاتتىڭ اكەسى دە مالىمدەمە جاسادى. ول ءادىل سوت تالاپ ەتتى.

وقيعا ىشكى ىستەر ءمينيسترى ەرجان سادەنوۆ پەن الماتى وبلىسىنىڭ پروكۋراتۋراسى پىكىر ءبىلدىردى.

“الماتى وبلىسىنىڭ تالعار اۋدانىندا ورىن العان كامەلەتكە تولماعان بالانىڭ ولىمىنە قاتىستى ءمان-جايلار مەنىڭ جەكە باقىلاۋىمدا. وقيعا ورنىندا ءبىرىنشى ورىنباسارىمنىڭ باسشىلىعىمەن ءىىم قىزمەتكەرلەرىنەن قۇرالعان توپ جۇمىس ىستەۋدە. كىنالىلەر ءتيىستى جازاسىن الادى”، - دەدى ول.