Forýmnyń negizgi maqsaty: belsendi azamattarynyń basyn qosa otyryp, aýdannyń ekonomikalyq damý kórsetkishteri men áleýmettik turmys-tirshiligin, atqarylyp jatqan aýqymdy isterdi jurtshylyqqa tanystyryp, el damýyna baǵyttalǵan investitsiialyq jobalardy birlesip atqarýǵa usynys jasap, týǵan ólkemizdiń ósip-órkendeýine kópshilikti jumyldyrý bolatyn.
Forýmǵa Talǵardan shyqqan atqaminer azamattar: QR Parlamenti Senatynyń eks-depýtaty, qoǵam qairatkeri Ertarǵyn Astaev, «Atameken» Ulttyq kásipkerler palatasynyń komitet tóraǵasy Murat Ábenov, oblystyq qoǵamdyq keńestiń tóraǵasy Álihan Toibaev, Almaty oblysynyń kásipkerlik jáne indýstrialdy-innovatsiialyq damý basqarmasynyń basshysy Alimjan Tohtasýnov, oblystyq jáne aýdandyq máslihat depýtattary arnaiy shaqyrylyp, aýdan ákimi Raihan Sadyqova bastap, barlyq orynbasarlary, qala, aýyl ákimderi, aýdan kásipkerleri men metsenattar, «Nur Otan» partiiasynyń belsendi músheleri, kásiporyn basshylary qatysty. Jiyndy aýdan ákiminiń orynbasary Dármeniiar Qydyrbek júrgizip otyrdy.
– Elbasy usynǵan jańǵyrtýlar qazaqstandyqtardy san ǵasyrlyq tarih pen mádeniettegi, ulttyq sana-sezim men bilim salasyndaǵy rýhani reformaǵa bastaidy. Osy tusta Elbasy aldymyzǵa taiaý jyldardaǵy oryndaityn mindetterdi júktep, birshama naqty jobalardy júzege asyrý qajettigin tapsyrdy. Sonyń biri, «Týǵan jer» baǵdarlamasyn engizý arqyly patriotizmniń jarqyn úlgisin, naqty nátijemen kórsetý. Bul – mádenietti órkendetý men ólketaný, eldi mekenderdi abattandyrý, týrizmdi damytý jáne taǵy basqa da sharalardy qamtityn aýqymdy joba, – dep sózin bastaǵan Dámeniiar Alǵatbekuly jiylǵan qaýymdy forým qonaqtarymen tanystyrdy.
Sodan keiin sahna tórine qoiylǵan led ekran arqyly aýdan týraly «Týǵan jer» atty qysqa metrajdy derekti film usynyldy. Jiylǵan qaýym aldynda alǵashqy sóz kezegin aýdan ákimi Raihan Sadyqova aldy.
– Investitsiialyq ahýaldy jaqsartýdyń jáne tikelei investitsiialardy tartýdyń mańyzdylyǵy týraly Elbasymyz Nursultan Ábishuly Nazarbaev árdaiym aityp keledi. Óziniń Qazaqstan halqyna joldaýynda Memleket basshysy jańa jahandyq naqty ahýalda jańa investitsiialyq saiasat qabyldaýdyń mańyzdylyǵy týraly taǵy atap ótti. Talǵar jeri investitsiia tartý men ózara tiimdi seriktestikter qurýǵa qolaily aimaq. Elimizde júrgizilip jatqan ekonomikalyq reformalar aýdanymyzdyń ekonomikalyq sektorlarynyń túbegeili órkendeýine septigin tigizip keledi. Ásirese, indýstrialdy-innovatsiialyq damý baǵdarlamasy ónerkásip óndirisin damytýǵa zor múmkindik berdi. Osy baǵdarlama aiasynda aýdanymyzda «Amiran» balalarǵa arnalǵan sút taǵamdaryn óndiretin zaýyt pen sút – taýarly fermasy , «Baiserke-Agro» et óńdeitin kesheni men sút óńdeiin zaýyty, «IýSKO» kópsalaly logistikalyq kesheni, «Sultan» dárilik zattar shyǵarytyn zaýyty, «Etolon Girdokorm» balyqtarǵa arnalǵan azyqtar óndiretin zaýyty, «Lesnaia Skazka» taýly demalys oryny ashylyp, «Glazman» tigin óndirisi jańartýdan ótti,- degen aýdan ákimi osy atalǵan jobalardy júzege asyrý úshin aýdanymyzǵa 20,6 mlrd. teńge investitsiia tartylyp, 300-den asa jumys oryndary ashylǵanyn tilge tiek etti.
Sonymen qatar, sońǵy eki jylda invetitsiia tartý saiasatynyń arqasynda aýdanymyzda «Artpraim Qazaqstan» rezina plitalar shyǵaratyn zaýyt, «Kerýen Pliýs» plastikalyq zattar shyǵaratyn zaýyt,«Talhiz Fýd» konservilengen júgeri óndiretin tseh, « Jetisý Stroi Servis» jylyblok óndiretin tsehy iske qosylǵanyn da jetkizdi. Bul jobalarǵa 2,5 mlrd. teńge investitsiia tartylyp, 372 adam jumyspen qamtylǵanyn da aitqan aýdan basshysy óńirdegi óndiris pen kásipkerlik salasyndaǵy basqa da jetistikter men jańa ashylyp jatqan jumys oryndary týraly sóz qozǵap, bul kúngi forým aiasynda bolatyn kezdesýler men dialogtar bolashaqtaǵy ózara tiimdi jáne jan jaqty yntymaqtastyqty damytýǵa, aýdan ekonomikasynyń barlyq salalarynda investitsiialyq áleýetti tiimdi qoldanýǵa múmkindik beretinine senim artty.
Sodan keiin kezekpen sóz alǵan qoǵam qairatkeri E. Astaev, «Atameken» Ulttyq kásipkerler palatasynyń komitet tóraǵasy M. Ábenov, Almaty oblysynyń kásipkerlik jáne indýstrialdy-innovatsiialyq damý basqarmasynyń basshysy A. Tohtasýnovtar Elbasynyń maqalasynda aitylǵan baǵdarlamalardy júzege asyrý men onyń el bolashaǵyn baiandy etýge qosar úlesi týraly sóz qozǵap, týǵan jerimizdi kórkeitý, onyń ekonomikasyn damytyp, ál-aýqatyn jaqsartý barshamyzdyń boryshymyz ekenin alǵa tartsa, «Kerýen Pliýs» JShS-niń atqaýshy direktory A.Katashev, «HOVA Sentral Aziia Ltd» JShS-niń direktory Ǵ.Amanbaev, «Sintez KZ» JShS-niń direktory I.Rybin, «KazLift» mekemesiniń direktory A.Skripin, «Juldyz» JShS-niń tóraǵasy J. Djekenov, «AgroMelioStroi» JShS-niń basshysy B.Baibolovtar ózderi basqaryp otyrǵan kásiporyndardyń tynys-tirshiligi týraly sóz qozǵady.
Bul kúngi forým barysynda aýdanymyzǵa investitsiia tartý maqsatynda kelgen birqatar azamattarmen quny 42 mlrd. teńge bolatyn eki jaqty berneshe memorandýmǵa qol qoiyldy. «Týǵan jer» baǵdarlamasy aiasynda quny 100 mln. teńge bolatyn kólemi 485 sharshy metrlik sport zalyn turǵyzyp, aýyl ákimshiliginiń igiligine tapsyrýdy uiǵarǵan besaǵashtyq jeke kásipker Q. Meiirbekovpen de eki jaqty memorandýmǵa qol qoidy. Osyndai basqosýlardyń qashanda el igiligi úshin bereri mol bolmaq.
