Prezident Qasym-Jomart Toqaev «Ana tili» gazetine bergen suhbatynda Talǵar oqiǵasy haqynda pikirin aitty, - dep habarlaidy Dalanews.kz.
Memlekette zań men tártip ústemdigi ornaýy tiis ekenin, Qańtar oqiǵasyn da uiymdasqan qylmystyq toptar jasaǵanyn qaitalap aitqan memleket basshysy: «Osy oqiǵaǵa qatysy bar azamattar boiynsha myna máseleni eske salǵym keledi. Qazaq halqy shetelden kelgen otandastaryn «qandasym» dep, qushaq jaia qarsy aldy. Tarihi Otanyna oralǵandar Qazaqstannyń zańdaryna qatań baǵynyp, qoǵamdyq tártipti saqtap, zańsyz áreketterden aýlaq bolýy kerek. Olar buryn ózderi turǵan elde biliktiń talabyn saqtap, ondai áreket jasaǵan joq qoi?!», – dep oiyn aitqan.
Arasha.kz málimetinshe, bul sóz kisi qolynan qaza tapqan Sherzat Polattyń ákesi Qarjaýbai Nurymovtyń tarihi Otanyna oralǵan qandas bolǵany sebepti aitylyp otyr. Alaida, qandas mártebesi zań boiynsha, shetelden tarihi Otanyna kelgen ulty qazaq azamatqa Qazaqstan azamattyǵyn alǵanǵa deiin beriletin ýaqytsha mártebe. Iaǵni, respýblika azamaty atanǵan soń, qandas mártebesi joiylady. Biraq bilik pen qoǵam túsiniginde bul joiylmai keledi.
Eski Qazaqstan tusynda da qandastar deitin qaýymǵa osy taqilettes qiǵash pikirler aitylǵan. Máselen, Jańaózen oqiǵasynan soń qurylǵan úkimet komissiiasyn basqarǵan Ómirzaq Shókeev «..oqiǵaǵa kináli oralmandar, sondyqtan olardy basqa ólkelerge kóshirý kerek ..» dep aitqan pikiri bar. Sondai-aq, sol kezdegi prezident N.Nazarbaevtyń saiasi máseleler jónindegi keńesshisi Ermuhambet Ertisbaev Ertisbaev Londonda «Jańaózendegi oqiǵaǵa oralmandar sanynyń kóbeiýi túrtki boldy» dep málimdegen.
Qandastar haqyndaǵy prezidenttiń túpki oiy basqasha bolýy da múmkin. Bálkim Talǵar oqiǵasyn jáne onyń ainalasyndaǵy daý-damaidy memleket basshysyna «qandastardyń áreketi» etip kórsetip, solai esep berip júrgen adamdar bolýy múmkin ekenin de umytpaǵan jón sekildi.
