پرەزيدەنت قاسىم-جومارت توقايەۆ «انا ءتىلى» گازەتىنە بەرگەن سۇحباتىندا تالعار وقيعاسى حاقىندا پىكىرىن ايتتى، - دەپ حابارلايدى Dalanews.kz.
مەملەكەتتە زاڭ مەن ءتارتىپ ۇستەمدىگى ورناۋى ءتيىس ەكەنىن، قاڭتار وقيعاسىن دا ۇيىمداسقان قىلمىستىق توپتار جاساعانىن قايتالاپ ايتقان مەملەكەت باسشىسى: «وسى وقيعاعا قاتىسى بار ازاماتتار بويىنشا مىنا ماسەلەنى ەسكە سالعىم كەلەدى. قازاق حالقى شەتەلدەن كەلگەن وتانداستارىن «قانداسىم» دەپ، قۇشاق جايا قارسى الدى. تاريحي وتانىنا ورالعاندار قازاقستاننىڭ زاڭدارىنا قاتاڭ باعىنىپ، قوعامدىق ءتارتىپتى ساقتاپ، زاڭسىز ارەكەتتەردەن اۋلاق بولۋى كەرەك. ولار بۇرىن وزدەرى تۇرعان ەلدە بيلىكتىڭ تالابىن ساقتاپ، ونداي ارەكەت جاساعان جوق قوي؟!»، – دەپ ويىن ايتقان.
Arasha.kz مالىمەتىنشە، بۇل ءسوز كىسى قولىنان قازا تاپقان شەرزات پولاتتىڭ اكەسى قارجاۋباي نۇرىموۆتىڭ تاريحي وتانىنا ورالعان قانداس بولعانى سەبەپتى ايتىلىپ وتىر. الايدا، قانداس مارتەبەسى زاڭ بويىنشا، شەتەلدەن تاريحي وتانىنا كەلگەن ۇلتى قازاق ازاماتقا قازاقستان ازاماتتىعىن العانعا دەيىن بەرىلەتىن ۋاقىتشا مارتەبە. ياعني، رەسپۋبليكا ازاماتى اتانعان سوڭ، قانداس مارتەبەسى جويىلادى. ءبىراق بيلىك پەن قوعام تۇسىنىگىندە بۇل جويىلماي كەلەدى.
ەسكى قازاقستان تۇسىندا دا قانداستار دەيتىن قاۋىمعا وسى تاقىلەتتەس قيعاش پىكىرلەر ايتىلعان. ماسەلەن، جاڭاوزەن وقيعاسىنان سوڭ قۇرىلعان ۇكىمەت كوميسسياسىن باسقارعان ءومىرزاق شوكەيەۆ «..وقيعاعا كىنالى ورالماندار، سوندىقتان ولاردى باسقا ولكەلەرگە كوشىرۋ كەرەك ..» دەپ ايتقان پىكىرى بار. سونداي-اق، سول كەزدەگى پرەزيدەنت ن.نازاربايەۆتىڭ ساياسي ماسەلەلەر جونىندەگى كەڭەسشىسى ەرمۇحامبەت ەرتىسبايەۆ ەرتىسبايەۆ لوندوندا «جاڭاوزەندەگى وقيعاعا ورالماندار سانىنىڭ كوبەيۋى تۇرتكى بولدى» دەپ مالىمدەگەن.
قانداستار حاقىنداعى پرەزيدەنتتىڭ تۇپكى ويى باسقاشا بولۋى دا مۇمكىن. بالكىم تالعار وقيعاسىن جانە ونىڭ اينالاسىنداعى داۋ-دامايدى مەملەكەت باسشىسىنا «قانداستاردىڭ ارەكەتى» ەتىپ كورسەتىپ، سولاي ەسەپ بەرىپ جۇرگەن ادامدار بولۋى مۇمكىن ەكەنىن دە ۇمىتپاعان ءجون سەكىلدى.
