Almaty oblysy Talǵar aýdanynyń ákimi Jolan Omarov qaıtys boldy, dep habarlaıdy Dalanews.kz.
"Ókinishke oraı, ońaıshylyqpen sengimiz kelmeıtin qaraly habardy estip otyrmyz, qysqa ýaqyt ishinde bizdiń aýdanǵa kóp nárse jasap úlgergen jaqsy adamymyz - ákimimizden aıyrylyp qaldyq", delingen İnstagram-daǵy kris_p_talgar paraqshasynda.
Ákimdiktiń habarlaýynsha, ol búgin tańerteń pnevmonıadan qaıtys bolǵan.
Jolan Omarov 2019 jyldyń qyrkúıeginde Talǵar aýdanynyń ákimi bolyp taǵaıyndaldy.
Ol 1979 jyly 7 shildede dúnıege kelgen, úılengen, tórt balasy bar.
Ál-Farabı atyndaǵy Qazaq memlekettik ulttyq ýnıversıtetin zańger, Qazaq ulttyq agrarlyq ýnıversıtetin kadastr bakalavry mamandyqtary boıynsha bitirgen.
Eńbek jolyn «KIRZAVOD-1» JSHS atqarýshy dırektory bolyp bastady.
Ár jyldary «KIRZAVOD-1» JSHS bas dırektorynyń orynbasary, «Almatyjer ǴÓO» EMK Almaty fılıaly zań sektorynyń mamany, Qaskeleń jer-kadastrlyq fılıalynyń basshysy, «Almatyjer ǴÓO» EMK dırektorynyń birinshi orynbasary, dırektordyń mindetin atqarýshy, Qazaqstan Respýblıkasy Jer resýrstaryn basqarý agenttiginiń «Jer kadastry ǵylymı-óndiristik ortalyǵy» SHJQ RMK Almaty oblystyq fılıaly dırektorynyń mindetin atqarýshy, Almaty oblystyq jer qatynastary basqarmasynyń bas mamany, oblystyq týrızm basqarmasynyń bólim basshysy qyzmetterin atqarǵan. 2014 jyldyń tamyz aıynan bastap Almaty oblystyq jer qatynastary basqarmasynyń basshysy boldy.
Keıin Raıymbek aýdanynyń ákimi bolǵan.
Búgingi kúnge deıin Jolan Ybyraıaqynuly Talǵar aýdanynyń ákimi qyzmetinde bolǵan.
Jolan Omarov jaıynda belgili aqyn Janarbek Áshimjan kúńirene jazyp, marqumdy keıingi býynnyń ishinde oza shaýyp, eldiń kóshin bastaǵan sanaýly sańlaqqa teńedi.
“Raıymbek aýdanyn sátimen túletip, Talǵar halqyn da retimen qýantyp kele jatyr ediń ǵoı…
Senim men Úmittiń, jaýapkershilik pen nátıjeniń qadirin arttyrǵan, el-halyqtyń jaǵdaıynan basqa ýaıymyń joq edi. Naǵyz kemelińe kelgen shaǵyń edi. Jasaǵan bergen jan baýyrym-aı. İnim-aı Ańqyldaǵan aqjúregim! Baldaǵy altyn semserim-aı!
… Neshe kúnnen beri júregim sýyldap júr edi. Duǵa tilep edim. “Jamandyqtyń aldyn jaqsy jańalyqtar alady” dep，kóńildi notalarmen nazardy basqa jaqqa burýǵa tyrysyp baǵyp edik… “Jolantaı，batyr ǵoı，bárin jeńip tik turyp ketse eken” dep Qudaı taǵaladan tilep edik.
Seni kórgen saıyn alqymyn áppaq saqaly japqan 80-90-daǵy alyp abyz qarıa kóz aldyma keletin edi.
Kórmegen kósheńde Jaratqan Iem panasyna alsyn，jaryǵym. Iman nuryń peıishtiń tórinde shalqysyn. Qandaı qıyn… Memleketke kerek eń sapaly Azamattardyń biri ketti aramyzdan”, – dep jazdy aqyn áleýmettik jelidegi paraqshasynda.
