Memleket basshysynyń «Zań jáne tártip» bastamasyn iske asyrý aiasynda Almaty oblysynyń Talǵar aýdanyndaǵy birqatar mektepter men kolledjderde quqyqtyq mádenietti qalyptastyrýǵa baǵyttalǵan arnaiy oqý sabaǵy engiziledi.
Jobany júzege asyrý máseleleri Prezidenttiń ishki saiasat jáne kommýnikatsiialar jónindegi kómekshisi Arman Qyryqbaevtyń óńirge jumys sapary barysynda ótken keńeste talqylandy.
Memleket basshysy «Ádiletti Qazaqstan: zań men tártip, ekonomikalyq ósim, qoǵamdyq optimizm» atty Joldaýynda «Qoǵamymyzda zań men tártip ústemdik qurýǵa tiis. Bul – búkil qoǵamnyń jáne ár adamnyń qaýipsizdigin qamtamasyz etýge qatysty eń basty talap. Biz sonda ǵana Ádiletti, Taza jáne Qaýipsiz Qazaqstandy qura alamyz», – degen bolatyn.
Quqyqtyq sana men tártipke qurmetti qalyptastyrý bala kezden bastalýy tiis. Bul joba osy mańyzdy mindetti júzege asyrýdy kózdeidi.
Keńes jumysyna quqyq qorǵaý organdarynyń ókilderi, oblystyq bilim basqarmasynyń basshylyǵy men pedagogtar qaýymdastyǵy qatysty. Onyń qorytyndysy boiynsha jobany Talǵar aýdanyndaǵy 3 kolledj ben 10 mektepte pilottyq negizde engizý týraly sheshim qabyldandy. Sabaqtar jańa oqý jylynan bastap 7–10-synypta oqityn 7 500-den astam oqýshyny qamtityn bolady.
Jobany Oqý-aǵartý ministrligi men Bas prokýratýra birlesip ázirledi. Onyń basty maqsaty – jas urpaqtyń boiynda zań ústemdigine, azamattyq jaýapkershilikke jáne Otanǵa adal qyzmet etýge degen sanaly kózqaras qalyptastyrý.
Sabaq barysynda quqyqbuzýshylyqtardyń aldyn alý, býllingke qarsy kúres, ózara qurmet pen yntymaqtastyqty nyǵaitý, sondai-aq gýmanistik qundylyqtardy dáripteý máselelerine erekshe nazar aýdarylady.
Kýrsty júrgizetin negizgi tulǵalar – quqyq qorǵaý organdarynda uzaq jyldar boiy minsiz qyzmet atqarǵan, mol tájiribesi bar ardager mamandar. Bas prokýratýra qoǵam men memleketke adal qyzmet etýdiń úlgisin kórsete alatyn 26 bilikti mamannan quralǵan arnaiy oqytýshylar tobyn daiyndady.
– Adal ári jaýapty azamat tárbieleý – memlekettik saiasattyń strategiialyq mindeti. Zań – kez kelgen memlekettiń berik irgetasy. Zańǵa qurmet bolǵan jerde ádilet, qaýipsizdik jáne damý bolady. Sondyqtan jas urpaqqa quqyq pen tártipke degen sanaly kózqaras qalyptastyrý – bárimizdiń ortaq paryzymyz. Jańa oqý kýrsy dál osy qundylyqtardy nasihattaýǵa baǵyttalǵan, – dedi Arman Qyryqbaev.
Pilottyq kezeń óz tiimdiligin dáleldese, joba elimizdiń basqa óńirlerinde de keńinen júzege asyrylady.
Keńes sońynda Arman Qyryqbaev jaýapty memlekettik organdarǵa naqty tapsyrmalar berip, jobanyń barlyq kezeńde sapaly ári nátijeli oryndalýyn qamtamasyz etýdi júktedi.
