Almatydaǵy Family Park ákimshiligi saiabaqtyń taǵdyry qyl ústinde turǵanyn málimdedi. Olardyń aitýynsha, park ornalasqan jer telimin memleket menshigine qaitarý máselesi kóterilip jatyr, dep habarlaidy dalanews.kz.
Ákimshilik bul orynnyń kópshilik úshin erekshe mańyzǵa ie ekenin atap ótti. Olardyń sózinshe, Family Park kóptegen almatylyqtyń balalyq shaǵymen, otbasylyq serýenderimen jáne merekelik demalystarymen bailanysty. Kóp jyldan beri saiabaq qala turǵyndarynyń eń tanymal demalys oryndarynyń biri bolyp keledi.
Másele AMANAT partiiasynyń Almaty qalalyq filialynda ótken «Jer amanaty» komissiiasynyń otyrysynda qaralǵan. Jiynda turǵyndardyń ótinishteri, saiabaqtyń jaǵdaiyna qatysty shaǵymdar jáne qoǵamdaǵy talqylaýlar negizinde bul másele kóterilgeni aitylǵan.
Alaida Family Park ákimshiliginiń málimdeýinshe, ózderine atalǵan ótinishter men shaǵymdar kórsetilmegen. Sonyń saldarynan olardyń mazmunymen tanysyp, túsinikteme berý múmkindigi bolmaǵan.
Sonymen qatar otyrysta park ornalasqan jer telimin paidalaný zańdylyǵy qaralǵan. Biraq ákimshilik ókilderi talqylaýǵa shaqyrylmaǵanyn jáne oǵan deiin parkke eshqandai resmi talap ne eskertý kelip túspegenin aitty. Keiin ǵana jaldaý shartyn buzý týraly habarlama alǵan.
Osyǵan bailanysty Family Park ákimshiligi birqatar suraq qoidy. Atap aitqanda, nege 27 jyl boiy zańdy dep tanylǵan jaldaý shartyn dál qazir buzý qolǵa alynǵanyn, nege parkke onyń jaǵdaiyna qatysty resmi eskertý jasalmaǵanyn jáne «kóptegen shaǵymdardyń» ákimshilikke ne úshin usynylmaǵanyn túsindirýdi surady.
Sondai-aq park ókilderi nege olardy talqylaýǵa qatystyrmaǵanyn, jaldaý shartyn buzý týraly habarlama men sotqa talap aryzdyń bir kúnde joldanǵanyn jáne sotqa deiingi retteý rásimi nege júrgizilmegenin surap otyr.
Budan bólek, ákimshilik túrli memlekettik organdardyń jospardan tys tekserýleri qandai maqsatpen bastalǵanyna da jaýap kútetinin málimdedi.
