Ońtústik Koreianyń arnaiy prokýratýrasy eldiń burynǵy prezidenti Iýn Sok Elge ólim jazasyn taǵaiyndaýdy talap etti, dep habarlaidy dalanews.kz.
Mundai ótinish Seýl joǵary sotynda búlik uiymdastyrý isi boiynsha apelliatsiialyq tyńdaý kezinde aityldy. Aiyptaýshy taraptyń pikirinshe, burynǵy memleket basshysyna ómir boiyna bas bostandyǵynan aiyrý jazasy tym jeńil bolady.
Prokýratýra birinshi satydaǵy sottyń burynǵy áskeri qolbasshy No San Vonnyń jazbalaryn dálel retinde qabyldamaý týraly sheshimimen kelispeitinin málimdedi. Tergeý nusqasyna sáikes bul materialdar áskeri jaǵdai engizýge daiyndyq júrgizilgenin rastaidy.
Osy is aiasynda burynǵy qorǵanys ministri Kim En Henge de ómir boiyna bas bostandyǵynan aiyrý jazasyn taǵaiyndaý suraldy. Tergeý organy ony astyrtyn jospardyń negizgi qatysýshylarynyń biri dep sanaidy. Buǵan deiin birinshi satydaǵy sot oǵan 30 jylǵa bas bostandyǵynan aiyrý jazasyn taǵaiyndaǵan bolatyn.
Eske salaiyq, aqpanda sot Iýn Sok Eldi 2024 jyly áskeri jaǵdai engizýge áreket jasady dep tanyp, ómir boiyna bas bostandyǵynan aiyrǵan.
