2025 jyly Qazaqstanda 73,8 mlrd teńgeniń nesiesi tolyq nemese ishinara esepten shyǵaryldy. Onyń ishinde ekinshi deńgeili bankter 54,9 mlrd teńgeniń, al mikroqarjy uiymdary men kollektorlyq agenttikter 18,9 mlrd teńgeniń bereshegin keshirgen, dep habarlaidy dalanews.kz.
Sonymen qatar, kepilsiz tutynýshylyq nesieler boiynsha problemalyq bereshekti retteýge arnalǵan jeke josparlar aiasynda jalpy 814,3 mlrd teńgeniń qaryzy qaita qaraldy. Onyń ishinde bankter 332,4 mlrd teńgeniń, mikroqarjy uiymdary 400,8 mlrd teńgeniń, al kollektorlyq agenttikter 81 mlrd teńgeniń bereshegin rettegen.
Osy jumystardyń nátijesinde jalpy 740,4 mlrd teńgeniń nesiesi qaita qurylymdaldy. Atap aitqanda, bankter 277,5 mlrd teńgeniń, al mikroqarjy uiymdary men kollektorlyq agenttikter 462,9 mlrd teńgeniń nesiesiniń tólem sharttaryn qaita qaraǵan.
Sondai-aq, azamattardyń shamadan tys qaryzǵa batýynyń aldyn alý maqsatynda jańa shekteýler engizildi. Endi sońǵy 36 ai ishinde nesiesi keshirilgen nemese jasandy túrde qaita qurylymdalǵany týraly málimeti bar, tólem qabileti tómendeý qaýpi joǵary azamattarǵa kepilsiz tutynýshylyq nesie berý shekteledi.
Budan bólek, boryshtyq júkteme koeffitsientiniń shekti deńgeiin saqtaý úshin merzimi bes jyldan asatyn kepilsiz tutynýshylyq nesielerdi berýge de shekteý qoiyldy. Bul sharalar halyqtyń artyq qaryzdanýyn azaityp, qarjy naryǵyndaǵy táýekelderdi tómendetýge baǵyttalǵan.
