Indıra Qarabekova – segiz balanyń anasy. Osyǵan deıin Asqar Bilálov januıaǵa kómek kórsetip kelgen, jaqynda turǵyn úı máselesin tolyq sheship berýge sheshim qabyldady.
«Qarabekovter januıasyn biraz ýaqyttan beri bilemin. Buǵan deıin azyq-túlik sebetteri túrinde qaıyrymdylyq kórsetkenbiz. Úılerine kelgen saıyn laıyqty ómir súrýge jaǵdaı jasalmaǵanyn baıqaıtynmyn. Sondyqtan Naýryz merekesi qarsańynda osyndaı syılyq jasaýdy sheshtik», – dedi kásipker.
Úsh bólmeli páter jóndeýden ótken jáne jartylaı jıhazdalǵan. Bul páter Indıra Qarabekova men balalary úshin tosynsyı boldy. Kópbalaly ana saıajaıda jaldamaly úıde turyp kelgen.
«Bizdiń jeke úıimiz bolady dep armandaıtynbyz. Biraq bul armanymyz osynshama jyldam oryndalady dep oılamappyn. Asqardyń jasaǵan jaqsylyǵy úshin alǵys bildiremin. Búgin bizdiń ómirimiz kúrt ózgerdi», – deıdi kópbalaly ana.
Bul kásipkerdiń alǵashqy qaıyrymdylyq sharasy emes. Osyǵan deıin kásipker turaqty túrde qalalyq qaıyrymdylyq aksıalaryna qatysyp keledi, múmkindigi shekteýli balalarǵa merekelik sharalarynyń uıymdastyrýshysy.
«Biz qoǵamda bolyp jatqan isterge beıjaı qaramaı, únemi atsalysyp júretin kásipkerlerdiń izgi isteri týraly keńinen nasıhattap, olardy jastar aldynda úlgi etip otyrýymyz kerek. Qoǵamdaǵy ózekti áleýmettik jobalardy júıeli sheshý úshin Ulttyq kásipkerler palatasy «Meniń atamekenim» jobasyn iske qosty, atamekenim.kz portalynda kómekke muqtaj jandar «Maǵan kómek kerek» bólimine ótinim qaldyrýyna bolady. Al kómek qolyn sozýǵa daıyn adamdar «Kómek berý» bólimine ótip, qoldaý kórsete alady», – dedi Almaty oblysy Kásipkerler palatasynyń adamı kapıtaldy damytý bóliminiń basshysy Almagúl Ońǵarbaeva.
