Taldyqorǵanda jas býynnyń bastamasymen ekologiialyq senbilik ótti. «Taza El - Taza Bolashaq» atty bul aktsiia jastardyń týǵan qalasyna degen janashyrlyǵyn tanytty. Is-shara elimizde qolǵa alynǵan «Taza Qazaqstan» respýblikalyq bastamasy aiasynda uiymdastyryldy,- dep habarlaidy Dalanews.kz
Senbilikke «Jasyl El» jasaqtary men «Taldyqorǵan jastary» qalalyq jastar ortalyǵynyń qyzmetkerleri, eriktiler men belsendiler qatysty. Olar «Oqýshylar saraiy» men Jastar ortalyǵynyń ainalasyn tazalap, qoqys jinap, ainalany retke keltirdi.
Is-sharanyń basty maqsaty - tabiǵatty qorǵaý men ainalany taza ustaýǵa úndeý ǵana emes, jastardyń ekologiialyq mádenietin qalyptastyrý, qorshaǵan ortaǵa degen jaýapkershiligin arttyrý.
Qalalyq jastar ortalyǵynyń jetekshisi Erkebulan Jaqan bul joly tazalyq jumystaryn qala ortalyǵynan bastaý týraly sheshim qabyldaǵandaryn aitty.
«Biz Qaratal men Balyqty ózenderiniń jaǵalaýlaryn jii tazalaimyz. Alaida bul joly óz aýlamyzdan, iaǵni Oqýshylar saraiy men Jastar ortalyǵy mańynan bastaýdy jón kórdik. El Prezidenti Qasym-Jomart Kemeluly Toqaev aitqandai, tazalyq – eń aldymen, óz úiiń men aýlańnan bastalýy kerek. Biz osy ustanymdy qoldaimyz», – dedi ol.
Sonymen qatar «Taldyqorǵan jastary» ortalyǵy áleýmettik jobalar aiasynda NEET sanatyndaǵy jastarmen de jumys isteidi. Bul – bilim almaityn jáne resmi túrde jumys istemeitin jastar toby. Qalada olardyń sany shamamen 2000-ǵa jýyq.
«Bizdiń maqsatymyz – bul jastardy qoǵamǵa beiimdeý, túrli sporttyq, shyǵarmashylyq jáne kásiptik jobalarǵa tartý. Ár jas azamat óz qabiletin ashyp, qoǵamnan ornyn taba alady dep senemiz», – deidi Erkebulan Jaqan.
