تالدىقورعاندا جاس بۋىننىڭ باستاماسىمەن ەكولوگيالىق سەنبىلىك ءوتتى. «Taza El - Taza Bolashaq» اتتى بۇل اكسيا جاستاردىڭ تۋعان قالاسىنا دەگەن جاناشىرلىعىن تانىتتى. ءىس-شارا ەلىمىزدە قولعا الىنعان «تازا قازاقستان» رەسپۋبليكالىق باستاماسى اياسىندا ۇيىمداستىرىلدى،- دەپ حابارلايدى Dalanews.kz
سەنبىلىككە «جاسىل ەل» جاساقتارى مەن «تالدىقورعان جاستارى» قالالىق جاستار ورتالىعىنىڭ قىزمەتكەرلەرى، ەرىكتىلەر مەن بەلسەندىلەر قاتىستى. ولار «وقۋشىلار سارايى» مەن جاستار ورتالىعىنىڭ اينالاسىن تازالاپ، قوقىس جيناپ، اينالانى رەتكە كەلتىردى.
ءىس-شارانىڭ باستى ماقساتى - تابيعاتتى قورعاۋ مەن اينالانى تازا ۇستاۋعا ۇندەۋ عانا ەمەس، جاستاردىڭ ەكولوگيالىق مادەنيەتىن قالىپتاستىرۋ، قورشاعان ورتاعا دەگەن جاۋاپكەرشىلىگىن ارتتىرۋ.
قالالىق جاستار ورتالىعىنىڭ جەتەكشىسى ەركەبۇلان جاقان بۇل جولى تازالىق جۇمىستارىن قالا ورتالىعىنان باستاۋ تۋرالى شەشىم قابىلداعاندارىن ايتتى.
«ءبىز قاراتال مەن بالىقتى وزەندەرىنىڭ جاعالاۋلارىن ءجيى تازالايمىز. الايدا بۇل جولى ءوز اۋلامىزدان، ياعني وقۋشىلار سارايى مەن جاستار ورتالىعى ماڭىنان باستاۋدى ءجون كوردىك. ەل پرەزيدەنتى قاسىم-جومارت كەمەل ۇلى توقايەۆ ايتقانداي، تازالىق – ەڭ الدىمەن، ءوز ءۇيىڭ مەن اۋلاڭنان باستالۋى كەرەك. ءبىز وسى ۇستانىمدى قولدايمىز»، – دەدى ول.
سونىمەن قاتار «تالدىقورعان جاستارى» ورتالىعى الەۋمەتتىك جوبالار اياسىندا NEET ساناتىنداعى جاستارمەن دە جۇمىس ىستەيدى. بۇل – ءبىلىم المايتىن جانە رەسمي تۇردە جۇمىس ىستەمەيتىن جاستار توبى. قالادا ولاردىڭ سانى شامامەن 2000-عا جۋىق.
«ءبىزدىڭ ماقساتىمىز – بۇل جاستاردى قوعامعا بەيىمدەۋ، ءتۇرلى سپورتتىق، شىعارماشىلىق جانە كاسىپتىك جوبالارعا تارتۋ. ءار جاس ازامات ءوز قابىلەتىن اشىپ، قوعامنان ورنىن تابا الادى دەپ سەنەمىز»، – دەيدى ەركەبۇلان جاقان.
