Taldyqorǵanda Jańa jyl qarsańynda bolǵan jarylystan Bekpaevtar otbasy qaza taýyp, olardyń artynda úsh bala qaldy. Qaiǵydan qan jutqan otbasy músheleri bilik tarapynan naqty kómek kórmegenderin aityp, kináliler amnistiia arqyly jazadan bosap kete me dep alańdap otyr,- dep habarlaidy Dalanews.kz "Newtimes.kz"-ke silteme jasap.
Jarylys 31 jeltoqsan kúni oryn alǵan. Oqiǵa ornynda Erlan jáne Daniia Bekpaevtar kóz jumdy, al olardyń 16 jastaǵy uly Asan aýrýhanada úsh aidan keiin qaitys boldy. Asan sportpen ainalysyp, fýtbol oinaǵan jáne mektepte belsendi bolǵan.
Aman qalǵandar mektep jasyndaǵy eki qyz bala jáne úlken uldary, 22 jastaǵy Ernur. Qazir Ernur muragerlik qujattardy rásimdeýmen ainalysyp júr. Týystarynyń aitýynsha, oǵan ata-anasynan quny shamamen 9 million teńge bolatyn pátermen birge 20 million teńgeden astam nesie muraǵa qaldy. Bul nesieler marqum ata-anasynyń atyna rásimdelgen.
Týystary Jetisý oblysynyń ákimi Beibit Isabaevqa kómek surap barǵan. Alaida olardyń aitýynsha, ákim jaǵdaiǵa nemquraily qarap, tipti mysqyldaǵan:
"Ol kúlip turyp: “Ákeleriń nesieni tym kóp alǵan ǵoi, biraq biz qazaqpyz ǵoi” dep jaýap berdi", – deidi týystary.
Olar naqty kómek ornyna tek azyq-túlik sebeti men mektep formasyn usynǵanyn aitady.
"Bizge birneshe ret "700 myń teńge aldyńdar" dep aitty. Bul aqshany ákim óz qaltasynan bergendei. Ol – memlekettiń qarajaty. Al ákimdik tarapynan esh kómek bolmady. Olar bizge kómekteskisi kelmeidi. Sebebi olar jarylysqa qatysty jaýapkershilikten qutylǵysy keletin siiaqty", – deidi týystary.
Kaspi, Home Credit jáne Otbasy banki otbasyna qaryzdy óteýdi 6 aiǵa keiinge qaldyrýǵa ǵana kelisim bergen.
Tragediiadan keiin Ernur muǵalim bolyp jumysyn jalǵastyrýǵa tyrysqan, biraq ata-anasy men inisinen aiyrylǵan soń, psihologiialyq aýyrtpalyqqa shydai almai, jumystan ketýge májbúr bolǵan. Týystarynyń aitýynsha, áleýmettik qyzmetter onyń bul áreketine narazy bolyp, «jumysty tastaýǵa haqyń joq» dep qysym jasaǵan.
Marqum Erlan Bekpaev agrosektorda uzaq jyldar eńbek etken, qant qyzylshasy, soia, júgeri egistigimen ainalysqan. Al Daniia Bekpaeva densaýlyq saqtaý salasynda 30 jylǵa jýyq jumys istegen. Týystary olardyń eńbegi eskerýsiz qalyp otyrǵanyn aitady.
Qazir otbasy aman qalǵan balalarǵa turaqty baspana berilse degen ótinishpen bilikke júginýde. Olar áleýmettik jelide aqsha jinaýdy ar sanap, ondai jolǵa júgingileri kelmeitinin aitty.
Oǵan qosa, týystary jarylysqa kináli tulǵalar amnistiia boiynsha merziminen buryn bosap ketýi múmkin dep qaýiptenedi. Oqiǵanyń resmi sebebi áli jariialanǵan joq, biraq otbasy jarylysqa meshitke aparatyn gaz magistrali sebep bolýy múmkin dep sanaidy. Bul meshit Bolat Nazarbaevtyń atymen bailanysty.
