Búgin Taldyqorǵanda qazaq mýzykasynyń saiypqyrany, áigili kúishi, kompozitor, dirijer Nurǵisa Tilendievtiń 100 jyldyǵyna arnalǵan eske alý sharasy ótti. N. Tilendiev atyndaǵy mýzyka mektebiniń aldynda óner sańlaǵynyń eskertkishine gúl shoqtary qoiylyp, onyń mýzykalyq shyǵarmalary oryndaldy, dep habarlaidy Dalanews.kz
Oblys basshylyǵynyń atynan eske alýǵa qatysqan oblys ákiminiń orynbasary Dias Esdáýletov kópshilikti mereitoimen quttyqtap, IýNESKO 2025 jyldy Nurǵisa Tilendiev jyly dep jariialaǵanyn, sondyqtan bul mereitoidyń dúniejúzilik mánge ie bolǵanyn atap ótti.
- Búgin Taldyqorǵanda N.Tilendiev atyndaǵy balalar mýzyka mektebiniń aýlasynda, eskertkish aldynda mádeniet maitalmanynyń rýhyna bas iip, ǵasyrlyq toiyn bastaýymyzdyń ózinde úlken mán jatyr. Osy mekteptiń jas órenderi urpaqtar sabaqtastyǵyn úzbei, Nurǵisa atalarynyń jolyn jańa zamanǵa sai laiyqty jalǵaidy dep senemiz. Oblys ortalyǵynan bastalǵan mereitoilyq osyndai taǵylymdy is-sharalar óńirdiń barlyq aýdan-qalalarynda jyl boiy jalǵasady, - dedi D. Esdáýletov.
Eskertkishtiń mańynda Taldyqorǵan balalar kórkem sýret mektebi oqýshylarynyń sýret salý pleneri uiymdastyrylyp, jas sýretshiler dáýlesker kúishi-kompozitordyń beinesin qaǵaz betine túsirdi. Sonymen qatar Jetisý oblysynyń Dánesh Raqyshev atyndaǵy filarmoniiasynyń «Jetisý virtýozy» ansambli shaǵyn kontsert qoiyp, N.Tilendievtiń shyǵarmalaryn oryndady.
Eske alý sharasyna qatysqan oqýshylardyń biri Symbat Jumabaiqyzy mýzyka mektebiniń dombyra klasynda oqidy.
- Biyl Nurǵisa atamyzdyń týǵanyna 100 jyl toldy. Osyǵan orai eske alý sharasyna arnaiy qatysyp otyrmyz. Qazir osy mýzyka mektebiniń 4 synybynda oqimyn. Dombyrany kishkentaiymnan jaqsy kórdim, arnaiy mektepke deiin de azdap domybra tartatyn edim. Endi kásibi túrde meńgerip jatyrmyn. Men Nurǵisa Tilendievtiń «Ata tolǵaýy», «Álqissa», «Kósh kerýeni» siiaqty kúilerin tarta alamyn. Onyń kúilerinde náziktik te, aryndylyq ta bar jáne astarynda úlken maǵyna tunyp jatyr. Biz kúidi sezinip tartý úshin kúidiń mán-mazmunyn túsinýdi de úirendik,- deidi S.Jumabaiqyzy.
Eske salsaq, búgin B.Rimova atyndaǵy drama teatrynda Dánesh Raqyshev atyndaǵy filarmoniianyń Muqan Tólebaev atyndaǵy qazaq halyq aspaptary orkestri júz jyldyq mereitoiǵa orai «Óz elim» atty kontsert ótkizedi.
