بۇگىن تالدىقورعاندا قازاق مۋزىكاسىنىڭ سايىپقىرانى، ايگىلى كۇيشى، كومپوزيتور، ديريجەر نۇرعيسا تىلەندييەۆتىڭ 100 جىلدىعىنا ارنالعان ەسكە الۋ شاراسى ءوتتى. ن. تىلەندييەۆ اتىنداعى مۋزىكا مەكتەبىنىڭ الدىندا ونەر ساڭلاعىنىڭ ەسكەرتكىشىنە گۇل شوقتارى قويىلىپ، ونىڭ مۋزىكالىق شىعارمالارى ورىندالدى، دەپ حابارلايدى Dalanews.kz 

وبلىس باسشىلىعىنىڭ اتىنان ەسكە الۋعا قاتىسقان وبلىس اكىمىنىڭ ورىنباسارى دياس ەسداۋلەتوۆ كوپشىلىكتى مەرەيتويمەن قۇتتىقتاپ، يۋنەسكو 2025 جىلدى نۇرعيسا تىلەندييەۆ جىلى دەپ جاريالاعانىن، سوندىقتان بۇل مەرەيتويدىڭ دۇنيەجۇزىلىك مانگە يە بولعانىن اتاپ ءوتتى.

- بۇگىن تالدىقورعاندا ن.تىلەندييەۆ اتىنداعى بالالار مۋزىكا مەكتەبىنىڭ اۋلاسىندا، ەسكەرتكىش الدىندا مادەنيەت مايتالمانىنىڭ رۋحىنا باس ءيىپ، عاسىرلىق تويىن باستاۋىمىزدىڭ وزىندە ۇلكەن ءمان جاتىر. وسى مەكتەپتىڭ جاس ورەندەرى ۇرپاقتار ساباقتاستىعىن ۇزبەي، نۇرعيسا اتالارىنىڭ جولىن جاڭا زامانعا ساي لايىقتى جالعايدى دەپ سەنەمىز. وبلىس ورتالىعىنان باستالعان مەرەيتويلىق وسىنداي تاعىلىمدى ءىس-شارالار ءوڭىردىڭ بارلىق اۋدان-قالالارىندا جىل بويى جالعاسادى، - دەدى د. ەسداۋلەتوۆ.

ەسكەرتكىشتىڭ ماڭىندا تالدىقورعان بالالار كوركەم سۋرەت مەكتەبى وقۋشىلارىنىڭ سۋرەت سالۋ پلەنەرى ۇيىمداستىرىلىپ، جاس سۋرەتشىلەر داۋلەسكەر كۇيشى-كومپوزيتوردىڭ بەينەسىن قاعاز بەتىنە ءتۇسىردى. سونىمەن قاتار جەتىسۋ وبلىسىنىڭ دانەش راقىشيەۆ اتىنداعى فيلارمونياسىنىڭ «جەتىسۋ ۆيرتۋوزى» ءانسامبلى شاعىن كونسەرت قويىپ، ن.تىلەندييەۆتىڭ شىعارمالارىن ورىندادى.

ەسكە الۋ شاراسىنا قاتىسقان وقۋشىلاردىڭ ءبىرى سىمبات جۇماباي قىزى مۋزىكا مەكتەبىنىڭ دومبىرا كلاسىندا وقيدى.

- بيىل نۇرعيسا اتامىزدىڭ تۋعانىنا 100 جىل تولدى. وسىعان وراي ەسكە الۋ شاراسىنا ارنايى قاتىسىپ وتىرمىز. ءقازىر وسى مۋزىكا مەكتەبىنىڭ 4 سىنىبىندا وقيمىن. دومبىرانى كىشكەنتايىمنان جاقسى كوردىم، ارنايى مەكتەپكە دەيىن دە ازداپ دومىبرا تارتاتىن ەدىم. ەندى كاسىبي تۇردە مەڭگەرىپ جاتىرمىن. مەن نۇرعيسا تىلەندييەۆتىڭ «اتا تولعاۋى»، «ءالقيسسا»، «كوش كەرۋەنى» سياقتى كۇيلەرىن تارتا الامىن. ونىڭ كۇيلەرىندە نازىكتىك تە، ارىندىلىق تا بار جانە استارىندا ۇلكەن ماعىنا تۇنىپ جاتىر. ءبىز كۇيدى سەزىنىپ تارتۋ ءۇشىن كۇيدىڭ ءمان-مازمۇنىن ءتۇسىنۋدى دە ۇيرەندىك،- دەيدى س.جۇماباي قىزى.

ەسكە سالساق، بۇگىن ب.ريموۆا اتىنداعى دراما تەاترىندا دانەش راقىشيەۆ اتىنداعى فيلارمونيانىڭ مۇقان تولەبايەۆ اتىنداعى قازاق حالىق اسپاپتارى وركەسترى ءجۇز جىلدىق مەرەيتويعا وراي  «ءوز ەلىم» اتتى كونسەرت وتكىزەدى.