Jetisý oblysynda halyqtyń áleýmettik osal toptary sanatynan 30 otbasy jańa úili boldy. Taldyqorǵan qalasyndaǵy «Jastar-3» jańa turǵyn aýdanynan berilgen úilerdiń kiltin oblys ákimi Beibit Isabaev tabystady, - dep habarlaidy Dalanews.kz Jetisý oblysy ákiminiń baspasóz qyzmetine silteme jasap.
Jalpy jyl basynan beri oblys ortalyǵynda kezektegi 102 otbasy jańa baspanaǵa kirdi. Atap aitqanda, «Bereke» kottedj qalashyǵynyń, «Jastar-3» turǵyn alabynda áleýmettik osal top sanatyndaǵy azamattar men kóp balaly otbasylar úili boldy.
Kilt berý saltanatyna qatysqan oblys ákimi Beibit Isabaev jańa qonys ielerin qýanyshtarymen quttyqtap, baspanamen qamtý baǵytynda óńirde atqarylyp jatqan sharalarǵa toqtaldy.
"Memlekettiń qoldaýymen qabyldanyp jatqan sharalardyń arqasynda Taldyqorǵanda biyl jyl basynan beri áleýmettik osal toptar sanatymen kezekte turǵan 102 kópbalaly otbasy úili boldy. Solardyń qatarda búgin sizder de óz úilerińizdiń kiltin alyp otyrsyzdar. Dál osy jańa turǵyn alabynda 56 úi salyndy, biyl biz 150 úi salýdy josparlap otyrmyz. Jalpy munda 700-den astam úi bolady. Jol jasalady, qujattar daiyn. Sondai-aq biyl gazdandyrý jumystaryn bastaimyz. Osylaisha bul aýdan aldaǵy ýaqytta qalanyń úlken ári ádemi zamanaýi shaǵyn aýdandarynyń biri bolady. Sodan keiin biz munda áleýmettik nysandardy salý máselesin qarastyra bastaimyz. Jalpy ótken jyly Taldyqorǵanda turǵyn úi kezegi 8,3%-ǵa azaidy, osy jyly taǵy 1400-den astam otbasyna turǵyn úi beriledi dep josparlap otyrmyz. Sóitip 2023-2025 jyldary oblys ortalyǵynda kezekte turǵan 5 myńǵa jýyq adam turǵyn úimen qamtamasyz etiledi", - dedi B. Isabaev.
Eske salsaq, osydan 10 kún buryn osy shaǵyn aýdanda alǵashqy 23 otbasy jańa qonysqa kirgen bolatyn.
Jalpy búgingi jańa qonys ieleriniń arasynda tolyq emes otbasylar, múgedek balalardy asyrap otyrǵan otbasylar, kámeletke tolǵanǵa deiin jetim qalǵan jáne ata-anasynyń qamqorlyǵynsyz qalǵandar, múgedek bala tárbielep otyrǵan otbasylar, I jáne II toptaǵy múgedekter, zeinetkerler bar.
Turǵyn úi kiltin alǵandardyń qataryndaǵy Shabelskii otbasy qýanyshyn bólisti.
"Qazir 25 jasqa keldim. 2011 jyldan bastap turǵyn úige kezeginde turamyn. Men kishkentaiymnan ájemniń qolynda óstim. Osy kezge deiin áiel, bala-shaǵammen birge ájemniń úiinde birge turdyq. Árine, óz úiimiz bolsa dep armandadyq, ásirese eki qyzym óz bólmemiz bolsa deitin. Endi, mine, úiimizge qol jetkizdik, qýanyshymyzda shek joq", - dedi jas otaǵasy Sviatoslav Alekseevich.
Qalanyń taǵy bir turǵyny Janar Ábdilmanova da jańa qonystyń qýanyshyna keneldi. Ol «tolyq emes otbasy» sanatynda turǵyn úige kezeginde 13 jyl turǵan.
"Búgin bizdiń áýletimizde úlken mereke. Jaldamaly páterde kóship júretin ýaqytymyz endi artta qaldy. Balalarymnyń jaily, ádemi, keń úide erkin ósetinine qýanyp otyrmyn", - deidi ol.
Taldyqorǵandyq Dana Demidova da óz jaiyn qysqasha baiandap berdi:
"Meniń eki balam bar, kishi ulym 16 jasta. Aýyr jol apatynyń saldarynan kúieýim mert boldy, densaýlyǵym nasharlap, ózim múgedektik aldym. Búgin otbasymyz úlken qýanyshqa kenelip, qonystoiyn toilap jatyrmyz. Biz bul kúndi 14 jyl kúttik. Búgingi qýanysh ielerin shyn júrekten quttyqtaimyn", - dedi densaýlyq saqtaý salasynda feldsher bolyp 25 jyldai jumys istegen D.Demidova.
Atap ótsek, ár úidiń jalpy aýdany 76 sharshy metr. Munda úsh turǵyn bólme, as úi men jýynatyn bólme bar. Úi elektr qazandyǵy arqyly jylytylady, al gaz qazandyqtary tabiǵi gaz jetkizilgennen keiin iske qosylady. Óńir basshysynyń aitýynsha, jyl sońyna deiin turǵyn úi alabyna gaz tartý josparda bar.
Jalpy ótken jyly oblysta 371,9 myń sharshy metr turǵyn úi tapsyrylsa, biyl taǵy 380 myń sharshy metr turǵyn úi berý josparlanyp otyr.
