Jiynda qala ákimi 2017 jyly atqarǵan qyzmeti jáne 2018 jylǵa mindetter týraly baiandama jasady.
Qala ákiminiń aitýynsha, 2017 jyldyń qorytyndysy boiynsha ónerkásip óndirisindegi ónim kólemi 67,0 mlrd. teńgeden asyp, 2016 jylmen salystyrǵanda 15%-ǵa artty. Ótken jyly 7 kásiporyn iske qosylyp, qoldanystaǵy 2 ónerkásip keńeitilgen. Sonyń nátijesinde 237 jańa jumys orny quryldy.
Biylǵy jyl mindetteriniń biri – «Taldyqorǵan» indýstrialdy aimaǵyna investitsiia tartý. Ázirge munda 2 kásiporyn jumys istep tur.
Baiandamadaǵy málimetterge júginsek, aýyl sharýashylyǵyndaǵy ónim kólemi 16 mlrd. teńgege jetken, qaladaǵy 71 sharýa qojalyǵy «Agrobiznes - 2020» baǵdarlamasy sheńberinde 5 kooperativke biriktirilgen.
Shaǵyn jáne orta biznes salasynda 58,1 mlrd. teńgeniń ónimi shyǵarylyp, 352 jańa jumys orny quryldy. Jalpy Taldyqorǵanda 26 myń adam eńbek etetin biznestiń 9861 sýbektisi jumys isteidi.
Biylǵy jyly qurylys salasyndaǵy basym baǵyttyń biri – kottedj qalashyǵyn salý. Jyl sońyna deiin quny 2,4 mlrd. teńge bolatyn 202 páterli 166 kottedj turǵyzý kózdelgen. Sonymen qatar jyl aiaǵyna deiin biýdjet qarajaty esebinen 520 páterli 9 kópqabatty úi, jeke qarajat esebinen 195 páterli 4 kópqabatty úi salynady.
Sol siiaqty biylǵy jyly qala ákimdigi 100 aýlany abattandyrý jobasyna kirispek. Sonyń ishinde 50 aýla aýmaǵy kásipkerlerdiń kómegimen «Týǵan jer» jobasy boiynsha júzege asyrylady dep kútilýde.
Qalany abattandyrý, kórkeitý, jol jóndeý baǵytynda da aýqymdy jumystar atqarylǵan. Qalany gazdandyrý jalǵasýda. Búgingi kúni tabiǵi gazǵa 393 abonent qosylsa, taǵy 233-in qosý boiynsha jumystar júrgizilýde. Gazǵa aýystyrý maqsatynda 5 qazandyqqa jańǵyrtý jumystaryn júrgizý úshin JSQ daiyndalýda. Jyl sońyna deiin onyń 2-eýinde jumystar aiaqtalady.
2017 jyly qalanyń jalpy uzyndyǵy 35,5 shaqyrym bolatyn 39 qosalqy kóshesine jóndeý jumystary júrgizildi. Biylǵy jyly taǵy 55 kóshege jóndeý josparyna engizilip otyr.
Baiandamadan keiin qala turǵyndary ózderin tolǵandyrǵan saýaldaryn qoidy. Turǵyndar tarapynan aitylǵan ózekti máselelerdiń ishinde balalar úshin shatyrly lagerdiń ornyna jazǵy demalys nysanyn salý, qoǵamdyq kólikterdiń qyzmet kórsetý sapasyn arttyrý, qaladaǵy áskeri qalashyqtaǵy kópqabatty úilerdi qalanyń kommýnaldyq menshigine ótkizý problemalary aityldy. Sonymen qatar, saýal qoiýshylardyń sózine súiensek, máselen, Qabylisa jyraý, Ǵ. Ormanov, Rústembekov kósheleriniń keibir qiylystarynda baǵdarshamnyń joqtyǵy avtokólikter úshin túrli qolaisyzdyqtar týǵyzyp otyr. Al Úitas saiajaiy turǵyndarynyń aýyz sýdan tapshylyq kórip otyrǵandaryna da birshama ýaqyt bolǵan. Qala kóshelerine gaz qubyrlaryn tósep júrgen qurylysshylar jumys aiaqtalǵan soń qazylǵan shuńqyrlardy jappai, joldardyń asfalttaryn retke keltirmei, sońdarynan qoqystar qaldyryp ketetin jaittar da kezdesedi. Osy jáne ózge de túiindi máselelerge qala ákimi jaýap berip, olardyń sheshilý joldaryn baiandady.
Esepti kezdesýdi qorytyndylaǵan oblys ákimi A. Batalov qala turǵyndary úshin oblystyń áleýmettik-ekonomikalyq damýy jaiynda qysqasha toqtalyp ótti. Aýyl sharýashylyǵyndaǵy, ónerkásip óndirisindegi, qurylys, turǵyn úi-kommýnaldyq salalardaǵy, áleýmettik baǵyttaǵy atqarylǵan jumystar jaiynda aita kele:
– Oblys ortalyǵy Taldyqorǵan qalasynyń biýdjeti sońǵy úsh-tórt jyl kóleminde edáýir ósti. Halqynyń sany 172 myńǵa jetip otyr. Biznes belsendi damyp keledi, salyq túsimi de artty, damý kórsetkishi jaqsy. Degenmen, áli kóńil aýdaratyn nárseler barshylyq, Máselen, Zerthana men Áielder konsýltatsiiasy ǵimarattaryn salý jaiynda naqty usynystar daiyndap kórsetý týraly aitqanmyn, bul tapsyrma ázirge oryndalǵan joq. Aldaǵy ýaqytta oblystyq densaýlyq saqtaý basqarasymen birigip, osyǵan kirisińder.Azamattarǵa arnalǵan úkimet, bassein nysany qurylystarynyń jumysyn jedeldetý kerek. Ortalyq alańdy jańǵyrtý isin, teatr ǵimaratyn shildede aiaqtaýdy tapsyramyn. Jańadan salynǵan shaǵyn aýdandarǵa shaǵyn sáýlettik formalar ornatyp, kók jelek otyrǵyzyp kórketý qajet.Qaladaǵy qoǵamdyq kólikter jańa, sapaly, jáne syiymdylyǵy úlken bolýy tiis. Qala biligi retinde tasymaldaýshylardan qyzmet kórsetý sapasyn kóterýdi talap etińder. Sol siiaqty gazdandyrý, qatty qaldyqtardy jinaý men suryptaý, kóshelerdi jóndeý, aýlalardy abattandyrý isin sapaly deńgeide jalǵastyrý kerek. Prezident óz Joldaýynda atap ótkendei, qai salany bolsa da damytýǵa «Smart Siti» júiesiniń múmkindigi mol. Sondyqtan «Aqyldy qala» jobasyna engizý – aldaǵy mindetterdiń biri.
Jalpy meniń bergen tapsyrmalarymdy nazarǵa alyp, usynys berip jatyrsyńdar. Endi sol aitylǵan usynystardy naqty júzege asyrsańdar, jumystyń nátijesi degen sol. Biz óz tarapymyzdan oblys ortalyǵyna jan-jaqty qoldaý kórsetýdi jalǵastyryp, qalanyń kórkeie berýine atsalysatyn bolamyz, – dedi A. Batalov.
Almaty oblysy ákiminiń baspasóz qyzmeti
https://dalanews.kz/32905
