Búgin Jetisý oblysynda Uly Jeńistiń 80 jyldyǵyna orai Taldyqorǵan qalasyndaǵy kóshege Keńes Odaǵynyń Batyry, Halyq Qaharmany, Armiia generaly, tuńǵysh Qorǵanys ministri Saǵadat Nurmaǵanbetovtiń atyna kóshe berý saltanaty ótti. Saltanatty jiynǵa oblys ákimi Beibit Isabaev, Batyrdyń nemeresi Aijan Nurmaǵambetova, áskeri qyzmetshiler, ardagerler, qala jurtshylyǵy qatysty,- dep habarlaidy Dalanews.kz
Kóshe ataýyn berý týraly bastamany alǵashqy bolyp Taldyqorǵan qalalyq Qarýly Kúshter Ardagerler keńesiniń ókilderi kótergen bolatyn. Bul bastama tiisti onomastikalyq komissiia tarapynan qoldaý tapty. Atap ótsek, oblys ortalyǵynyń «Shyǵys» shaǵyn aýdanynda ornalasqan, buryn ataýy bolmaǵan bul kósheniń uzyndyǵy 1,7 shaqyrym. Jáne bul – Taldyqorǵanda Halyq qaharmany ataǵyna ie adamǵa berilip otyrǵan alǵashqy kóshe.
Merekelik jiynda aldymen kóshe ataýy belgisi saltanatty túrde ashyldy. Taldyqorǵan áskeri garnizonynyń úrmeli aspaptar orkestri Qazaqstan Respýblikasynyń Memlekettik Gimnin oryndap, atqyshtar toby saltanatty túrde aspanǵa oq atty.
Oblys ákimi Beibit Isabaevtyń aitýynsha, Keńes Odaǵynyń Batyry Saǵadat Nurmaǵanbetovtiń atyna kóshe berý - Uly Jeńistiń 80 jyldyǵy qarsańyndaǵy mańyzdy sharanyń biri.
- Búgingi shara – Uly Otan soǵysynyń ardagerlerine, tyl eńbekkerlerine, búgingi beibit ómirdi syilaǵan barsha aǵa býynǵa halyqtyń kórsetken úlken qurmeti dep bilemin. Saǵadat Qojahmetuly – erjúrek jaýynger ǵana emes, Qazaqstan Qarýly Kúshteriniń tizginin ustaǵan memleket qairatkeri. Ol táýelsizdiktiń alǵashqy jyldarynda Qazaqstan Armiiasynyń negizin qalaýǵa bar kúsh-jigerin jumsap, ólsheýsiz úles qosty. Osyndai birtýar tulǵanyń áskeri murasyn zerdeleý, ónegeli ómirin urpaqqa nasihattaý – bizdiń ortaq paryzymyz, - dedi B. Isabaev.
Munan soń sóz alǵan Batyrdyń nemeresi Aijan Nurmaǵambetova jinalǵandardy merekemen quttyqtap, osy igi istiń basy-qasynan tabylǵan azamattarǵa rizashylyǵyn bildirdi.
- Bizdiń atamyz búkil sanaly ǵumyryn áskeri salaǵa arnady. Bul – jas urpaq jalǵastyrýǵa turatyn jáne jalǵastyrýy tiis ónegeli jol. Ol úshin «paryz», «mindet» degen sózderdiń mańyzy erekshe edi. Sondyqtan da bolar, onyń jalǵyz uly alǵashqylardyń biri bolyp Chernobyl apatynyń zardabyn joiýǵa attandy. Qazir elimizdiń barlyq derlik qalasynda Saǵadat Nurmaǵanbetovtiń esimimen atalatyn kósheler bar deýge bolady. Qairatker tulǵaǵa qurmet kórsetip, esimin el esinde máńgi qaldyrý maqsatynda búgingidei is-sharany uiymdastyrǵandaryńyz úshin Qorǵanys ministrligine, oblys ákimdigine, barsha azamattarǵa rizashylyǵymdy bildiremin, - dedi ol.
Saltanatty jiyn Jetisý oblystyq D.Raqyshev atyndaǵy filarmoniianyń «Kúreńbel» tobynyń oryndaýyndaǵy «Otan» ánimen qorytyndylandy.
Eske salsaq, Saǵadat Qojahmetuly Nurmaǵanbetov 1924 jyly qazirgi Aqmola oblysy Aqkól aýdany Qosym aýylynda týǵan. 1942 jyly keńes áskeri qataryna qabyldanyp, Túrikmenstanda pýlemetshiler daiyndaityn ýchilisheni úzdik aiaqtaǵan soń vzvod komandiri retinde maidan shebine attanady. Kýban, Don, Moldaviia jerlerinde, Oder, Shpree ózenderiniń boiynda jan alysyp, jan berisken shaiqastarǵa qatysty. 1945 jyly 21 jasynda Saǵadat Nurmaǵanbetovke Keńes Odaǵynyń Batyr ataǵy jáne «Altyn juldyz» berildi. Qazaqstan Prezidentiniń Jarlyǵymen 1991 jyly Memlekettik qorǵanys komitetiniń tóraǵasy, 1992 jyly Qorǵanys ministri qyzmetine taǵaiyndaldy. 1994 jyly «Halyq Qaharmany» ataǵy berilip, №1 «Altyn Juldyz» tabystaldy. 1995 jyly Armiia generaly ataǵymen otstavkaǵa shyǵyp, Qazaqstan Prezidentiniń keńesshisi boldy.
