بۇگىن جەتىسۋ وبلىسىندا ۇلى جەڭىستىڭ 80 جىلدىعىنا وراي تالدىقورعان قالاسىنداعى كوشەگە كەڭەس وداعىنىڭ باتىرى، حالىق قاھارمانى، ارميا گەنەرالى، تۇڭعىش قورعانىس ءمينيسترى ساعادات نۇرماعانبەتوۆتىڭ اتىنا كوشە بەرۋ سالتاناتى ءوتتى. سالتاناتتى جيىنعا وبلىس اكىمى بەيبىت يسابايەۆ، باتىردىڭ نەمەرەسى ايجان نۇرماعامبەتوۆا، اسكەري قىزمەتشىلەر، ارداگەرلەر، قالا جۇرتشىلىعى قاتىستى،- دەپ حابارلايدى Dalanews.kz
كوشە اتاۋىن بەرۋ تۋرالى باستامانى العاشقى بولىپ تالدىقورعان قالالىق قارۋلى كۇشتەر ارداگەرلەر كەڭەسىنىڭ وكىلدەرى كوتەرگەن بولاتىن. بۇل باستاما ءتيىستى ونوماستيكالىق كوميسسيا تاراپىنان قولداۋ تاپتى. اتاپ وتسەك، وبلىس ورتالىعىنىڭ «شىعىس» شاعىن اۋدانىندا ورنالاسقان، بۇرىن اتاۋى بولماعان بۇل كوشەنىڭ ۇزىندىعى 1،7 شاقىرىم. جانە بۇل – تالدىقورعاندا حالىق قاھارمانى اتاعىنا يە ادامعا بەرىلىپ وتىرعان العاشقى كوشە.
مەرەكەلىك جيىندا الدىمەن كوشە اتاۋى بەلگىسى سالتاناتتى تۇردە اشىلدى. تالدىقورعان اسكەري گارنيزونىنىڭ ۇرمەلى اسپاپتار وركەسترى قازاقستان رەسپۋبليكاسىنىڭ مەملەكەتتىك گيمنىن ورىنداپ، اتقىشتار توبى سالتاناتتى تۇردە اسپانعا وق اتتى.
وبلىس اكىمى بەيبىت يسابايەۆتىڭ ايتۋىنشا، كەڭەس وداعىنىڭ باتىرى ساعادات نۇرماعانبەتوۆتىڭ اتىنا كوشە بەرۋ - ۇلى جەڭىستىڭ 80 جىلدىعى قارساڭىنداعى ماڭىزدى شارانىڭ ءبىرى.
- بۇگىنگى شارا – ۇلى وتان سوعىسىنىڭ ارداگەرلەرىنە، تىل ەڭبەككەرلەرىنە، بۇگىنگى بەيبىت ءومىردى سىيلاعان بارشا اعا بۋىنعا حالىقتىڭ كورسەتكەن ۇلكەن قۇرمەتى دەپ بىلەمىن. ساعادات قوجاحمەت ۇلى – ەرجۇرەك جاۋىنگەر عانا ەمەس، قازاقستان قارۋلى كۇشتەرىنىڭ تىزگىنىن ۇستاعان مەملەكەت قايراتكەرى. ول تاۋەلسىزدىكتىڭ العاشقى جىلدارىندا قازاقستان ارمياسىنىڭ نەگىزىن قالاۋعا بار كۇش-جىگەرىن جۇمساپ، ولشەۋسىز ۇلەس قوستى. وسىنداي ءبىرتۋار تۇلعانىڭ اسكەري مۇراسىن زەردەلەۋ، ونەگەلى ءومىرىن ۇرپاققا ناسيحاتتاۋ – ءبىزدىڭ ورتاق پارىزىمىز، - دەدى ب. يسابايەۆ.
مۇنان سوڭ ءسوز العان باتىردىڭ نەمەرەسى ايجان نۇرماعامبەتوۆا جينالعانداردى مەرەكەمەن قۇتتىقتاپ، وسى يگى ءىستىڭ باسى-قاسىنان تابىلعان ازاماتتارعا ريزاشىلىعىن ءبىلدىردى.
- ءبىزدىڭ اتامىز بۇكىل سانالى عۇمىرىن اسكەري سالاعا ارنادى. بۇل – جاس ۇرپاق جالعاستىرۋعا تۇراتىن جانە جالعاستىرۋى ءتيىس ونەگەلى جول. ول ءۇشىن «پارىز»، «مىندەت» دەگەن سوزدەردىڭ ماڭىزى ەرەكشە ەدى. سوندىقتان دا بولار، ونىڭ جالعىز ۇلى العاشقىلاردىڭ ءبىرى بولىپ چەرنوبىل اپاتىنىڭ زاردابىن جويۋعا اتتاندى. ءقازىر ەلىمىزدىڭ بارلىق دەرلىك قالاسىندا ساعادات نۇرماعانبەتوۆتىڭ ەسىمىمەن اتالاتىن كوشەلەر بار دەۋگە بولادى. قايراتكەر تۇلعاعا قۇرمەت كورسەتىپ، ەسىمىن ەل ەسىندە ماڭگى قالدىرۋ ماقساتىندا بۇگىنگىدەي ءىس-شارانى ۇيىمداستىرعاندارىڭىز ءۇشىن قورعانىس مينيسترلىگىنە، وبلىس اكىمدىگىنە، بارشا ازاماتتارعا ريزاشىلىعىمدى بىلدىرەمىن، - دەدى ول.
سالتاناتتى جيىن جەتىسۋ وبلىستىق د.راقىشيەۆ اتىنداعى فيلارمونيانىڭ «كۇرەڭبەل» توبىنىڭ ورىنداۋىنداعى «وتان» انىمەن قورىتىندىلاندى.
ەسكە سالساق، ساعادات قوجاحمەت ۇلى نۇرماعانبەتوۆ 1924 جىلى قازىرگى اقمولا وبلىسى اقكول اۋدانى قوسىم اۋىلىندا تۋعان. 1942 جىلى كەڭەس اسكەرى قاتارىنا قابىلدانىپ، تۇرىكمەنستاندا پۋلەمەتشiلەر دايىندايتىن ۋچيليششەنi ءۇزدiك اياقتاعان سوڭ ۆزۆود كومانديرi رەتiندە مايدان شەبiنە اتتانادى. كۋبان، دون، مولداۆيا جەرلەرiندە، ودەر، شپرەە وزەندەرiنiڭ بويىندا جان الىسىپ، جان بەرىسكەن شايقاستارعا قاتىستى. 1945 جىلى 21 جاسىندا ساعادات نۇرماعانبەتوۆكە كەڭەس وداعىنىڭ باتىر اتاعى جانە «التىن جۇلدىز» بەرىلدى. قازاقستان پرەزيدەنتiنiڭ جارلىعىمەن 1991 جىلى مەملەكەتتiك قورعانىس كوميتەتiنiڭ ءتوراعاسى، 1992 جىلى قورعانىس مينيسترi قىزمەتىنە تاعايىندالدى. 1994 جىلى «حالىق قاھارمانى» اتاعى بەرىلىپ، №1 «التىن جۇلدىز» تابىستالدى. 1995 جىلى ارميا گەنەرالى اتاعىمەن وتستاۆكاعا شىعىپ، قازاقستان پرەزيدەنتiنiڭ كەڭەسشiسi بولدى.
