Belgili zańger ári qoǵam belsendisi Aigúl Orynbek buǵan deiin de ózine jalǵan aiyptar taǵylǵanyn, alaida qylmystyq negizi bolmaǵan soń isterdiń jabylǵanyn málimdedi, dep habarlaidy Dalanews.kz.
Aitýynsha, mundai jaǵdai birneshe ret qaitalanǵan.
“Sybailas jemqorlyqpen kúres jolynda kedergiler men jala jabý bolady.
Jemqorlar men sybailasqandar qylmystary ashylmas úshin bárine baratyny belgili emes pe?!
Qoǵam belsendisi bolǵan kúnnen bastap, maǵan jalamen qanshama qylmystyq is ashylyp, qylmystyń quramy bolmaǵan soń jabylǵan.
Shyny kerek basymnan ótip jatqan qylmystyq isterdiń, sottardyń birde bireýin halyqpen bólispegem”, - dep jazdy zańger áleýmettik jelidegi paraqshasynda.
Osy tusta ol qoldap jatqan halyqqa alyǵysyn aityp, jemqorlyqpen kúresýin jalǵastyra beretinin jetkizdi.
“El aldynda júrgen soń, ár ashylǵan iske soram aǵyp jylap júrsem, halyqtyń bolashaqqa degen úmiti úziledi emes pe?
Men jasaǵan árbir is-áreketim zańdy ekenine nyq senimdimin!
Reforma bolý úshin áreket bolý kerek, ol áreketter kedergisiz bolmaidy.
Osynshama halyqtyń, meni qoldaǵanyn oqyp qýanyp otyrmyn.
Meni qoldaýǵa jinalýdyń qajeti joq, mende bári jaqsy.
Arqamda men úshin jinalatyn bir qaýym el baryna kózderiń jetti me?!
Maǵan qatysty zańsyz is -áreket jasaǵandar, aiaǵymnan shalǵysy kelgender, jalǵan aqparat taratqandar zań aldynda jaýap beresińder!
Ómir -kúres, kúres ary qarai jalǵasady!”, - dedi ol.
Aita keteiik, keshe Shymkentte bloger Aigúl Orynbek ustaldy degen aqparat tarady. Bul týraly jýrnalist Mihail Kozachkov jazdy.
"Ol "Alaiaqtyq", "Sotqa deiingi is júrgizý derekterin jariia etý" jáne "Sot tóreligin júzege asyrýǵa kedergi jasaý" baptary boiynsha tirkelgen qylmystyq is sheńberinde kúdikke ilindi", - dep jazdy ol.
Aigúl Orynbek - zańger, Ulttyq quryltai múshesi, Qazaqstan prezidentiniń janyndaǵy Ulttyq qoǵamdyq senim keńes múshesi. Sonymen qatar, kásipker retinde de belgili. Ol qoǵamdaǵy daýly jaittarǵa únemi pikir bildirip keledi.
Eske salaiyq, kúni keshe ol Shymkent qalasynyń Sport basqarmasyn synap, Facebook áleýmettik jelisinde jazba jariialaǵan edi.
“Shymkent qalasy ákimdigi Sport basqarmasynyń basshysy Maratbek Myqtybekov , 7 qazan kúni máslihat depýtattarynyń aldynda “Ordabasy komandasynyń legionerlerine gonorarǵa”, dep 1 milliardttan astam qarajat suraǵan.
Sport basqarmasynyń satyp alý portalynda qyrkúiek aiynda 893 mln. teńge qarajatqa bir kózden memlekettik satyp alý jariialanyp, qorytyndy shyqqan.
Odan bólek, jyl sońyna eki ai qalǵanda taǵy 1 mlrd. astam qarajat ne maqsatta surap otyrsyz Maratbek myrza?
Osyndai sommalar bir kózden berilgeni qanshalyqty zańdy? Jyl basynda Ordabasyǵa bólingen 5 mlrd nelerińe jetpei jatyr Shymkent qalasy ákimdigi? Onyń barlyǵy qaida ketip jatyr? Máslihat depýtattary aqsha surasa nege bere beresizder?”, - dep jazdy zańger.
Osy tusta ol QR Bas prokýratýrasy Prezidenttiń tapsyrmasyn oryndamaityn basshylardy tergep tekserýdi suraitynyn jetkizdi.
“Ministr Erbol Myrzabosynov! Sizdi sport salasyn tazalaýǵa kelgenińizdi bilemin. Bizdiń Shymkent qalasyna kóńil bólýińizdi suraimyn. Byltyrdan beri dál osy sport basqarmasy jyl bitýine eki ai qalǵanda úlken sommalardy fýtbolisterge bóletini óte kúdik týdyrady.
2023 jyly bitýine 2 ai qalǵanda 500 million teńge, biylǵy jyl bitýine 2 ai qalǵanda bólingen 1 milliard qarajat taǵdyryn elimizdiń Bas prokýratýrasy men Qazaqstan Respýblikasynyń Ulttyq qaýipsizdik komiteti tekserýin suraimyn!”, - dedi ol.
