بەلگىلى زاڭگەر ءارى قوعام بەلسەندىسى ايگۇل ورىنبەك بۇعان دەيىن دە وزىنە جالعان ايىپتار تاعىلعانىن، الايدا قىلمىستىق نەگىزى بولماعان سوڭ ىستەردىڭ جابىلعانىن مالىمدەدى، دەپ حابارلايدى Dalanews.kz.
ايتۋىنشا، مۇنداي جاعداي بىرنەشە رەت قايتالانعان.
“سىبايلاس جەمقورلىقپەن كۇرەس جولىندا كەدەرگىلەر مەن جالا جابۋ بولادى.
جەمقورلار مەن سىبايلاسقاندار قىلمىستارى اشىلماس ءۇشىن بارىنە باراتىنى بەلگىلى ەمەس پە؟!
قوعام بەلسەندىسى بولعان كۇننەن باستاپ، ماعان جالامەن قانشاما قىلمىستىق ءىس اشىلىپ، قىلمىستىڭ قۇرامى بولماعان سوڭ جابىلعان.
شىنى كەرەك باسىمنان ءوتىپ جاتقان قىلمىستىق ىستەردىڭ، سوتتاردىڭ بىردە بىرەۋىن حالىقپەن بولىسپەگەم”، - دەپ جازدى زاڭگەر الەۋمەتتىك جەلىدەگى پاراقشاسىندا.
وسى تۇستا ول قولداپ جاتقان حالىققا الىعىسىن ايتىپ، جەمقورلىقپەن كۇرەسۋىن جالعاستىرا بەرەتىنىن جەتكىزدى.
“ەل الدىندا جۇرگەن سوڭ، ءار اشىلعان ىسكە سورام اعىپ جىلاپ جۇرسەم، حالىقتىڭ بولاشاققا دەگەن ءۇمىتى ۇزىلەدى ەمەس پە؟
مەن جاساعان ءاربىر ىس-ارەكەتىم زاڭدى ەكەنىنە نىق سەنىمدىمىن!
رەفورما بولۋ ءۇشىن ارەكەت بولۋ كەرەك، ول ارەكەتتەر كەدەرگىسىز بولمايدى.
وسىنشاما حالىقتىڭ، مەنى قولداعانىن وقىپ قۋانىپ وتىرمىن.
مەنى قولداۋعا جينالۋدىڭ قاجەتى جوق، مەندە ءبارى جاقسى.
ارقامدا مەن ءۇشىن جينالاتىن ءبىر قاۋىم ەل بارىنا كوزدەرىڭ جەتتى مە؟!
ماعان قاتىستى زاڭسىز ءىس -ارەكەت جاساعاندار، اياعىمنان شالعىسى كەلگەندەر، جالعان اقپارات تاراتقاندار زاڭ الدىندا جاۋاپ بەرەسىڭدەر!
ءومىر -كۇرەس، كۇرەس ارى قاراي جالعاسادى!”، - دەدى ول.
ايتا كەتەيىك، كەشە شىمكەنتتە بلوگەر ايگۇل ورىنبەك ۇستالدى دەگەن اقپارات تارادى. بۇل تۋرالى جۋرناليست ميحايل كوزاچكوۆ جازدى.
"ول "الاياقتىق"، "سوتقا دەيىنگى ءىس جۇرگىزۋ دەرەكتەرىن جاريا ەتۋ" جانە "سوت تورەلىگىن جۇزەگە اسىرۋعا كەدەرگى جاساۋ" باپتارى بويىنشا تىركەلگەن قىلمىستىق ءىس شەڭبەرىندە كۇدىككە ءىلىندى"، - دەپ جازدى ول.
ايگۇل ورىنبەك - زاڭگەر، ۇلتتىق قۇرىلتاي مۇشەسى، قازاقستان پرەزيدەنتىنىڭ جانىنداعى ۇلتتىق قوعامدىق سەنىم كەڭەس مۇشەسى. سونىمەن قاتار، كاسىپكەر رەتىندە دە بەلگىلى. ول قوعامداعى داۋلى جايتتارعا ۇنەمى پىكىر ءبىلدىرىپ كەلەدى.
ەسكە سالايىق، كۇنى كەشە ول شىمكەنت قالاسىنىڭ سپورت باسقارماسىن سىناپ، Facebook الەۋمەتتىك جەلىسىندە جازبا جاريالاعان ەدى.
“شىمكەنت قالاسى اكىمدىگى سپورت باسقارماسىنىڭ باسشىسى ماراتبەك مىقتىبەكوۆ ، 7 قازان كۇنى ءماسليحات دەپۋتاتتارىنىڭ الدىندا “ورداباسى كومانداسىنىڭ لەگيونەرلەرىنە گونورارعا”، دەپ 1 ميللياردتتان استام قاراجات سۇراعان.
سپورت باسقارماسىنىڭ ساتىپ الۋ پورتالىندا قىركۇيەك ايىندا 893 ملن. تەڭگە قاراجاتقا ءبىر كوزدەن مەملەكەتتىك ساتىپ الۋ جاريالانىپ، قورىتىندى شىققان.
ودان بولەك، جىل سوڭىنا ەكى اي قالعاندا تاعى 1 ملرد. استام قاراجات نە ماقساتتا سۇراپ وتىرسىز ماراتبەك مىرزا؟
وسىنداي سوممالار ءبىر كوزدەن بەرىلگەنى قانشالىقتى زاڭدى؟ جىل باسىندا ورداباسىعا بولىنگەن 5 ملرد نەلەرىڭە جەتپەي جاتىر شىمكەنت قالاسى اكىمدىگى؟ ونىڭ بارلىعى قايدا كەتىپ جاتىر؟ ءماسليحات دەپۋتاتتارى اقشا سۇراسا نەگە بەرە بەرەسىزدەر؟”، - دەپ جازدى زاڭگەر.
وسى تۇستا ول ق ر باس پروكۋراتۋراسى پرەزيدەنتتىڭ تاپسىرماسىن ورىندامايتىن باسشىلاردى تەرگەپ تەكسەرۋدى سۇرايتىنىن جەتكىزدى.
“مينيستر ەربول مىرزابوسىنوۆ! ءسىزدى سپورت سالاسىن تازالاۋعا كەلگەنىڭىزدى بىلەمىن. ءبىزدىڭ شىمكەنت قالاسىنا كوڭىل ءبولۋىڭىزدى سۇرايمىن. بىلتىردان بەرى ءدال وسى سپورت باسقارماسى جىل بىتۋىنە ەكى اي قالعاندا ۇلكەن سوممالاردى فۋتبوليستەرگە بولەتىنى وتە كۇدىك تۋدىرادى.
2023 جىلى بىتۋىنە 2 اي قالعاندا 500 ميلليون تەڭگە، بيىلعى جىل بىتۋىنە 2 اي قالعاندا بولىنگەن 1 ميلليارد قاراجات تاعدىرىن ەلىمىزدىڭ باس پروكۋراتۋراسى مەن قازاقستان رەسپۋبليكاسىنىڭ ۇلتتىق قاۋىپسىزدىك كوميتەتى تەكسەرۋىن سۇرايمىن!”، - دەدى ول.
