Májilis depýtaty Nartai Sársenǵaliev taksi júrgizýshileriniń máselesin kóterdi, dep habarlaidy Dalanews.kz.
Májilis depýtaty Nartai Sársenǵaliev Premer-ministrdiń birinshi orynbasary Roman Skliarǵa taksi jáne avtobýs júrgizýshileriniń máselesin kóterip, úkimettiń jańa bastamasyn synǵa aldy.
“Úkimet taksi men avtobýs júrgizýshilerin tártipke keltirý maqsatynda jańa zań jobasyn usyndy. Bul qujatta jolaýshylar tasymaly salasyndaǵy memlekettik quzyrettiń bir bóligin ózin-ózi retteý uiymdaryna (SRO) berý kózdelgen”, – dedi depýtat.
“Tarif belgileý men baǵa retteýdi jekemenshik uiymǵa berý – úlken qatelik”
Sársenǵalievtiń aitýynsha, zań jobasy ózin-ózi retteý uiymdaryna (SRO) jolaýshylar tasymalyndaǵy tarifterdi belgileý jáne baǵany retteý quzyretin bermek. Depýtat muny “úlken qatelik” dep sanaidy.
“Qurylýy múmkin ózin-ózi retteý uiymdarynyń azamattardy aiamaityny belgili. Bul tutas salany jekemenshik uiymdardyń qolyna ótkizip, qoldan monopoliia jasaýǵa baǵyttalǵan qisynsyz áreket. Buǵan álemdik mysaldar bar. Máselen, AQSh-tyń Kaliforniia shtatynda taksi qyzmeti ózin-ózi retteý uiymdaryna berilgennen keiin, olar tek ózderine jaqyn taksi kompaniialaryn tirkep, qalǵandaryna jumys isteýge múmkindik bermedi. Sonymen qatar, qaýipsizdik talaptary jeńildetilgendikten, taksi júrgizýshileri demalyssyz jumys isteýge májbúr boldy. Saldarynan taksi qatysqan jol apattarynyń sany 15%-ǵa artty. Bul – ózin-ózi retteý júiesin engizýdiń naqty saldary”, – dedi depýtat.
“Jol qaýipsizdigin jekemenshik uiymdarǵa tapsyrý – adamdardyń ómirine salǵyrt qaraý”
Sársenǵaliev bul júieni engizýge sarapshylar da, Májilis depýtattary da qarsy bolǵanyn atap ótti. Degenmen, memlekettik organdar joldaǵy qaýipsizdikti ózderi qamtamasyz ete almai otyryp, jaýapkershilikti jekemenshik uiymdarǵa ysyra salýǵa tyrysýda.
“Braziliiada jolaýshylar tasymaly ózin-ózi retteý uiymdaryna berilgennen keiin, olar litsenziialaý talaptaryn jeńildetti. Sonyń saldarynan avtobýstar qatysqan jol apattarynyń sany 15%-ǵa ósip, zardap shekkender sany artty. Bul bizge sabaq bolýy kerek.”
“Qazaqstanda jol apattary jyl saiyn júzdegen adamnyń ómirin jalmaidy. Osyndai jaǵdaida, jol qaýipsizdigin qamtamasyz etý jaýapkershiligin ózin-ózi retteý uiymdaryna tapsyrý – aqylǵa qonymsyz sheshim.”
“Taksisterdi qosymsha jarna tóleýge májbúrleý – halyqqa aýyr tiedi”
Sársenǵalievtiń aitýynsha, úkimet jańa zań jobasy arqyly árbir taksi júrgizýshisin ózin-ózi retteý uiymyna múshelikke kirgizip, jarna tóleýge mindettemek.
“Depýtattar bul normany synǵa alǵanda, ministrlik “taksi qyzmetimen ainalysatyn mobildi qosymshalarǵa tirkelgen jeke kásipkerler ǵana jarna tóleidi” dep sendirdi. Biraq mindetti tólemder engizilse, bul jolaýshy tasymaly qyzmetiniń qymbattaýyna ákeledi, onyń saldarynan qarapaiym halyq zardap shegedi.”
“Taksi jáne avtobýs tasymaly salasyna ózin-ózi retteý uiymyn engizý – tutas salany belgili bir toptyń qolyna ótkizip, monopoliia jasaýǵa aparatyn tikelei jol. Sondyqtan biz, “Amanat” fraktsiiasynyń bir top depýtaty, bul qisynsyz sheshimdi toqtatý úshin zańǵa naqty ózgerister engizdik. Barlyq áriptesterimizdi jáne Úkimet ókilderin osy túzetýlerdi qoldaýǵa shaqyramyn.”
Depýtat sonymen qatar ministrliktiń kólikti 5 minýttan artyq otaldyryp qoiýǵa tyiym salý týraly sheshimin qaita qaraýdy talap etti.
