Júrgizýshiler sózinshe, Resei nómirli kólikterdi keiingi kúnderi jol politsiia jii toqtatyp, tekserýdi kúsheitken. Júrgizýshisine aiyppul salyp, kóliktiń ózin aiyppul turaǵyna alyp ketken jaǵdailar kóbeie bastaǵan.
– Resei nómirin taqqan kólikterdi negizinen qarapaiym halyq minedi. Sondyqtan muny qarapaiym halyqqa qysym deýge bolady. Bilik qysymnan ózge jol tapsyn, jinalǵandaǵy maqsatymyz sol, – deidi Nur-Sultan turǵyny Bekjan Batyrbekov.
Osydan 6 ai buryn Reseiden 4 million teńgege kólik satyp alǵan ol dál sondai kólik Qazaqstanda 8 million turatynyn aitady. "Óitkeni Qazaqstanda kólikti memlekettik tirkeýge qoiý óte qymbat. Ózi minip júrgen kólikti tirkeý úshin 3-4 million teńge tóleýge tiis".
Onyń aitýynsha, jol politsiiasy aiyppul turaǵyna áketken kólikterdi tek kólik ieleri ǵana shyǵara alady. Al ol kólikterdiń iesi Reseide turady.
– Biz úsh jylǵa deiin kólikti aidaýǵa bolatyny jóninde senimhat alǵanbyz, – deidi jinalǵandar.
"Reseiden shyqqan "Lada" markaly kólikti 600 myń teńgege satyp alyp, taksiletip kún kórip júrmin" degen Baidos Baiturǵanov "Resei nómirli kólikter aiyppuldan jaltaryp ketedi" degen sóz jalǵan deidi.
– Jol qozǵalysyn baqylap turǵan "Sergek" kameralary Qazaqstan máshinelerine qandai aiyppul salsa , bizge de solai salady. Ony tólep júrmiz. Biz jan baǵý úshin júrgen adamdarmyz. Mundai problema bolatynyn bile tura úkimet Resei nómirli kólikterdi Qazaqstanǵa nege kirgizedi? Eýraziia ekonomika odaǵy bolǵan soń tirkelmei-aq júre beredi deitini qaida? – deidi ol.
Narazylyqqa jinalǵandar "Armeniiadan ákep, tirkelmei júrgen kólikterge ýaqytsha sary nómir berip, bilik jeńildik jasady, bizge de sóitsin nemese memlekettik tirkeýdi qarapaiym halyqtyń qaltasy kóteretindei etip arzandatsyn" degen talaptar qoidy.
Narazylar aldyna Nur-Sultan qalalyq ákimshilik politsiia bastyǵy Eljan Shópekov kelip, Resei nómirin taqqan kólikterdiń jappai aiyp turaǵyna áketilmeitinin aitty.
– Tek qana Reseide tirkeýden shyǵarylǵan kólikterdi tekserip jatyrmyz. Ondai kólikter Qazaqstanda júrý úshin tirkelýi kerek. Qujaty durys bolsa, eshkimdi ustamaimyz, kóligin qaitaryp beremiz. Jol politsiiasy zańǵa sai áreket etip otyr, – dep túsindirdi.
Qazaqstanda shetel nómirimen júrgen kólikterge bailanysty másele buryn da kóterilgen. Armeniiadan kólik ákelip, Qazaqstanǵa tirkemei júrgenderge 2019 jyly jappai tekserý bastalǵanda júrgizýshiler osyǵan uqsas talap aityp, Qazaqstannyń ár óńirinde narazylyqqa shyqqan. Sodan keiin bilik olarǵa "raqymshylyq" jasap, Armeniia, Qyrǵyzstan, Reseiden ákelgen kólikterdi 2020 jyldyń 1 aqpanynan bastap ýaqytsha tirkeýge qoiyp, arnaýly sary nómir bergen.
