جۇرگىزۋشىلەر سوزىنشە، رەسەي ءنومىرلى كولىكتەردى كەيىنگى كۇندەرى جول پوليسيا ءجيى توقتاتىپ، تەكسەرۋدى كۇشەيتكەن. جۇرگىزۋشىسىنە ايىپپۇل سالىپ، كولىكتىڭ ءوزىن ايىپپۇل تۇراعىنا الىپ كەتكەن جاعدايلار كوبەيە باستاعان.
– رەسەي ءنومىرىن تاققان كولىكتەردى نەگىزىنەن قاراپايىم حالىق مىنەدى. سوندىقتان مۇنى قاراپايىم حالىققا قىسىم دەۋگە بولادى. بيلىك قىسىمنان وزگە جول تاپسىن، جينالعانداعى ماقساتىمىز سول، – دەيدى نۇر-سۇلتان تۇرعىنى بەكجان باتىربەكوۆ.
وسىدان 6 اي بۇرىن رەسەيدەن 4 ميلليون تەڭگەگە كولىك ساتىپ العان ول ءدال سونداي كولىك قازاقستاندا 8 ميلليون تۇراتىنىن ايتادى. "ويتكەنى قازاقستاندا كولىكتى مەملەكەتتىك تىركەۋگە قويۋ وتە قىمبات. ءوزى ءمىنىپ جۇرگەن كولىكتى تىركەۋ ءۇشىن 3-4 ميلليون تەڭگە تولەۋگە ءتيىس".
ونىڭ ايتۋىنشا، جول پوليسياسى ايىپپۇل تۇراعىنا اكەتكەن كولىكتەردى تەك كولىك يەلەرى عانا شىعارا الادى. ال ول كولىكتەردىڭ يەسى رەسەيدە تۇرادى.
– ءبىز ءۇش جىلعا دەيىن كولىكتى ايداۋعا بولاتىنى جونىندە سەنىمحات العانبىز، – دەيدى جينالعاندار.
"رەسەيدەن شىققان "لادا" ماركالى كولىكتى 600 مىڭ تەڭگەگە ساتىپ الىپ، تاكسيلەتىپ كۇن كورىپ ءجۇرمىن" دەگەن بايدوس بايتۇرعانوۆ "رەسەي ءنومىرلى كولىكتەر ايىپپۇلدان جالتارىپ كەتەدى" دەگەن ءسوز جالعان دەيدى.
– جول قوزعالىسىن باقىلاپ تۇرعان "سەرگەك" كامەرالارى قازاقستان ماشينەلەرىنە قانداي ايىپپۇل سالسا ، بىزگە دە سولاي سالادى. ونى تولەپ ءجۇرمىز. ءبىز جان باعۋ ءۇشىن جۇرگەن ادامدارمىز. مۇنداي پروبلەما بولاتىنىن بىلە تۇرا ۇكىمەت رەسەي ءنومىرلى كولىكتەردى قازاقستانعا نەگە كىرگىزەدى؟ ەۋرازيا ەكونوميكا وداعى بولعان سوڭ تىركەلمەي-اق جۇرە بەرەدى دەيتىنى قايدا؟ – دەيدى ول.
نارازىلىققا جينالعاندار "ارمەنيادان اكەپ، تىركەلمەي جۇرگەن كولىكتەرگە ۋاقىتشا سارى ءنومىر بەرىپ، بيلىك جەڭىلدىك جاسادى، بىزگە دە ءسويتسىن نەمەسە مەملەكەتتىك تىركەۋدى قاراپايىم حالىقتىڭ قالتاسى كوتەرەتىندەي ەتىپ ارزانداتسىن" دەگەن تالاپتار قويدى.
نارازىلار الدىنا نۇر-سۇلتان قالالىق اكىمشىلىك پوليسيا باستىعى ەلجان شوپەكوۆ كەلىپ، رەسەي ءنومىرىن تاققان كولىكتەردىڭ جاپپاي ايىپ تۇراعىنا اكەتىلمەيتىنىن ايتتى.
– تەك قانا رەسەيدە تىركەۋدەن شىعارىلعان كولىكتەردى تەكسەرىپ جاتىرمىز. ونداي كولىكتەر قازاقستاندا ءجۇرۋ ءۇشىن تىركەلۋى كەرەك. قۇجاتى دۇرىس بولسا، ەشكىمدى ۇستامايمىز، كولىگىن قايتارىپ بەرەمىز. جول پوليسياسى زاڭعا ساي ارەكەت ەتىپ وتىر، – دەپ ءتۇسىندىردى.
قازاقستاندا شەتەل نومىرىمەن جۇرگەن كولىكتەرگە بايلانىستى ماسەلە بۇرىن دا كوتەرىلگەن. ارمەنيادان كولىك اكەلىپ، قازاقستانعا تىركەمەي جۇرگەندەرگە 2019 جىلى جاپپاي تەكسەرۋ باستالعاندا جۇرگىزۋشىلەر وسىعان ۇقساس تالاپ ايتىپ، قازاقستاننىڭ ءار وڭىرىندە نارازىلىققا شىققان. سودان كەيىن بيلىك ولارعا "راقىمشىلىق" جاساپ، ارمەنيا، قىرعىزستان، رەسەيدەن اكەلگەن كولىكتەردى 2020 جىلدىڭ 1 اقپانىنان باستاپ ۋاقىتشا تىركەۋگە قويىپ، ارناۋلى سارى ءنومىر بەرگەن.
