Tailand politsiiasy 22 jastaǵy reseilik Diana Nazimova men onyń 17 jastaǵy inisi Romannyń joǵalýyna bailanysty taǵy eki kúdiktini qolǵa túsirdi. Olar tergeý barysynda qylmysty jasaǵandaryn moiyndaǵan. Bul týraly Khaosod portaly habarlady, dep habarlaidy dalanews.kz.
Tergeý málimetinshe, ustalǵandar – 43 jastaǵy Than men 39 jastaǵy Thongtchai. Olardyń aitýynsha, bastapqyda jastardyń mototsiklin urlaýdy josparlaǵan. Alaida Diana men Roman qarsylyq kórsetken soń, kúdiktiler aldymen jasóspirim Romandy atyp óltirip, keiin onyń ápkesin soqqyǵa jyǵyp óltirgen.
Jaýap alý kezinde kúdiktilerdiń biri qyzǵa zorlyq-zombylyq jasamaǵanyn málimdegen.
Mototsikl bólshektelip, zirat mańyna kómilgen
Diana Nazimova men Roman 26 shilde kúni tańerteń iz-túzsiz joǵalǵan. Keiin olardyń Honda ADV 150 markaly mototsikli Tailandtyń Chonbýri provintsiiasyndaǵy eski zirat mańynan bólshektelgen kúide jerge kómilgeni anyqtaldy. 28 shilde kúni keshke sol mańdaǵy aýyl turǵyny orman ishinde qural-saiman ustaǵan tórt kúdikti er adamdy baiqap qalǵan. Politsiia kelgenshe olar oqiǵa ornynan qashyp úlgergen.
Quqyq qorǵaý organdary ormannan jýyrda ǵana qaita kómilgen shuńqyrdy taýyp, onyń ishinen joǵalǵan reseilikterdiń bólshektelgen mototsiklin alyp shyqqan.
Buǵan deiin taǵy eki adam ustalǵan
Buǵan deiin politsiia Hoi men Phang esimdi eki azamatty ustaǵan bolatyn. Tergeý olardyń qylmysqa qatysy bar adamdardyń quqyq qorǵaý organdary qorshaýǵa alǵan aýmaqtan qashyp ketýine kómektesýi múmkin degen kúdikke bailanysty júrgizilgen. Alaida negizgi kisi óltirý qylmysyn endi ustalǵan Than men Thongtchai moiyndap otyr.
