AQSh prezidenti Donald Tramp ákimshiligi taǵy 36 memlekettiń azamattary úshin Amerika Qurama Shtattaryna kirýge tyiym salýdy qarastyryp jatyr, dep habarlaidy Dalanews.kz.
AQSh Memlekettik hatshysy Marko Rýbio qol qoiǵan ishki diplomatiialyq qujatqa sáikes, bul memleketterge qatysty túzetý sharalaryn qabyldaý qajet bolýy múmkin degen talap qoiylǵan.
"Departament alańdatqan 36 eldi anyqtady. Eger bul memleketter 60 kún ishinde kórsetilgen talaptardy oryndamasa, olardyń kirýine tolyq nemese ishinara tyiym salynýy múmkin", — delingen qujat mazmunynda.
Memlekettik departamenttiń alańdaý sebebi retinde bul memleketterdiń keibirinde jeke basyn kýálandyratyn qujattardy bere alatyn quzyretti mekemeler joqtyǵy kórsetilgen.
Sondai-aq, keibir memleketter ózderiniń AQSh aýmaǵyndaǵy azamattaryn keri qabyldaýǵa atsalyspaǵan. Keibiriniń AQSh vizasy berilgen azamattary viza merziminen asyryp jibergen. Sonymen qatar, keibir memleketterdiń azamattary AQSh aýmaǵynda terrorlyq áreketterge, antisemittik jáne antiamerikalyq áreketterge qatysqan degen derekter keltirilgen.
60 kún ishinde bul máseleler sheshimin tappasa, myna memleketterge tolyq nemese ishinara kirýge tyiym salynýy múmkin: Angola, Antigýa jáne Barbýda, Benin, Býtan, Býrkina-Faso, Kabo-Verde, Kambodja, Kamerýn, Kot-d’Ivýar, Kongo Demokratiialyq Respýblikasy, Djibýti, Dominika, Efiopiia, Mysyr, Gabon, Gambiia, Gana, Qyrǵyzstan, Liberiia, Malavi, Mavritaniia, Niger, Nigeriia, Sent-Kits jáne Nevis, Sent-Liýsiia, San-Tome jáne Prinsipi, Senegal, Ońtústik Sýdan, Siriia, Tanzaniia, Tonga, Tývalý, Ýganda, Vanýatý, Zambiia jáne Zimbabve.
