Aýyl sharýashylyǵy ministrligi iri qara mal etin eksporttaýǵa qatysty engizilip jatqan jańa shekteýlerdiń tártibin túsindirdi, dep habarlaidy Dalanews.kz.
Ministrliktiń málimetinshe, 2025 jylǵy 31 jeltoqsannan bastap Qazaqstan aýmaǵynan úshinshi elderge jáne EAEO memleketterine iri qara mal etin áketýge arnalǵan kvotalardy bólý qaǵidalary kúshine endi. Bul norma 2026 jylǵy 30 maýsymǵa deiin qoldanylady. Eksportqa ruqsat etilgen ettiń jalpy kólemi 20 myń tonna deńgeiinde belgilengen.
Kvota menshikti bordaqylaý alańdaryndaǵy mal basyn paidalanatyn et óńdeýshi kásiporyndarǵa ǵana beriledi. Bir kásiporynǵa bólinetin kvota mólsheri bordaqylaý alańynyń qýatyna tikelei bailanysty.
Atap aitqanda,
– bordaqylaý alańy 5 myń bastan assa – 1 000 tonnaǵa deiin,
– 10 myń bastan assa – 2 000 tonnaǵa deiin,
– 15 myń bastan assa – 3 000 tonnaǵa deiin,
– 20 myń bastan assa – 4 000 tonnaǵa deiin,
– 50 myń bastan assa – 10 000 tonnaǵa deiin siyr etin eksporttaýǵa ruqsat etiledi.
Ministrliktiń túsindirýinshe, bul shara tolyq óndiristik tsiklmen jumys isteitin kásiporyndardy qoldaýǵa jáne syrtqy saýdadaǵy ashyqtyqty arttyrýǵa baǵyttalǵan.
Shekteýler eń aldymen ishki naryq múddesin qorǵaý jáne mal sharýashylyǵyn strategiialyq turǵyda damytý qajettiliginen týyndap otyr. Ýaqytsha kvotalaýdyń negizgi maqsaty – azyq-túlik qaýipsizdigin qamtamasyz etý, ónimdi tereń óńdeýdi yntalandyrý, statistikalyq eseptiń naqtylyǵyn arttyrý jáne ettiń shyǵý tegin baqylaý.
Vedomstvo atap ótkendei, shekteýlerdi engizýge keibir kompaniialar men shaǵyn soiý tsehtarynyń maldy bordaqylaýsyz qaita satyp, óndiristik bazany damytpai jumys isteý tájiribesi sebep bolǵan. Mundai shema deldaldyqty kúsheitip, ishki naryqtaǵy baǵanyń ósýine áser etken.
Sondyqtan jańa kvotalaý tetigi mal ósirýmen jáne bordaqylaýmen ainalyspaityn eksporttyq deldaldardy naryqtan yǵystyryp, óndiristik infraqurylymǵa investitsiia salyp, tehnologiia engizip, jumys oryndaryn quratyn naqty óndirýshilerdi qoldaýǵa baǵyttalǵan.
Ministrliktiń málimdeýinshe, kvotalardyń kólemi men qoldanylý merzimi ýákiletti organmen kelisý arqyly aiqyndalyp, bul ishki naryqtaǵy jaǵdaiǵa jedel áreket etýge múmkindik beredi.
Jalpy alǵanda, qabyldanǵan sheshim qazaqstandyq mal sharýashylyǵyn uzaq merzimdi damytýǵa, ishki naryqty turaqtandyrýǵa jáne tutynýshylar úshin sapaly siyr etiniń qoljetimdiligin arttyrýǵa baǵyttalǵan.
