اۋىل شارۋاشىلىعى مينيسترلىگى ءىرى قارا مال ەتىن ەكسپورتتاۋعا قاتىستى ەنگىزىلىپ جاتقان جاڭا شەكتەۋلەردىڭ ءتارتىبىن ءتۇسىندىردى، دەپ حابارلايدى Dalanews.kz.
مينيسترلىكتىڭ مالىمەتىنشە، 2025 جىلعى 31 جەلتوقساننان باستاپ قازاقستان اۋماعىنان ءۇشىنشى ەلدەرگە جانە ەاەو مەملەكەتتەرىنە ءىرى قارا مال ەتىن اكەتۋگە ارنالعان كۆوتالاردى ءبولۋ قاعيدالارى كۇشىنە ەندى. بۇل نورما 2026 جىلعى 30 ماۋسىمعا دەيىن قولدانىلادى. ەكسپورتقا رۇقسات ەتىلگەن ەتتىڭ جالپى كولەمى 20 مىڭ توننا دەڭگەيىندە بەلگىلەنگەن.
كۆوتا مەنشىكتى بورداقىلاۋ الاڭدارىنداعى مال باسىن پايدالاناتىن ەت وڭدەۋشى كاسىپورىندارعا عانا بەرىلەدى. ءبىر كاسىپورىنعا بولىنەتىن كۆوتا مولشەرى بورداقىلاۋ الاڭىنىڭ قۋاتىنا تىكەلەي بايلانىستى.
اتاپ ايتقاندا،
– بورداقىلاۋ الاڭى 5 مىڭ باستان اسسا – 1 000 تونناعا دەيىن،
– 10 مىڭ باستان اسسا – 2 000 تونناعا دەيىن،
– 15 مىڭ باستان اسسا – 3 000 تونناعا دەيىن،
– 20 مىڭ باستان اسسا – 4 000 تونناعا دەيىن،
– 50 مىڭ باستان اسسا – 10 000 تونناعا دەيىن سيىر ەتىن ەكسپورتتاۋعا رۇقسات ەتىلەدى.
مينيسترلىكتىڭ تۇسىندىرۋىنشە، بۇل شارا تولىق وندىرىستىك سيكلمەن جۇمىس ىستەيتىن كاسىپورىنداردى قولداۋعا جانە سىرتقى ساۋداداعى اشىقتىقتى ارتتىرۋعا باعىتتالعان.
شەكتەۋلەر ەڭ الدىمەن ىشكى نارىق مۇددەسىن قورعاۋ جانە مال شارۋاشىلىعىن ستراتەگيالىق تۇرعىدا دامىتۋ قاجەتتىلىگىنەن تۋىنداپ وتىر. ۋاقىتشا كۆوتالاۋدىڭ نەگىزگى ماقساتى – ازىق-تۇلىك قاۋىپسىزدىگىن قامتاماسىز ەتۋ، ءونىمدى تەرەڭ وڭدەۋدى ىنتالاندىرۋ، ستاتيستيكالىق ەسەپتىڭ ناقتىلىعىن ارتتىرۋ جانە ەتتىڭ شىعۋ تەگىن باقىلاۋ.
ۆەدومستۆو اتاپ وتكەندەي، شەكتەۋلەردى ەنگىزۋگە كەيبىر كومپانيالار مەن شاعىن سويۋ سەحتارىنىڭ مالدى بورداقىلاۋسىز قايتا ساتىپ، وندىرىستىك بازانى دامىتپاي جۇمىس ىستەۋ تاجىريبەسى سەبەپ بولعان. مۇنداي سحەما دەلدالدىقتى كۇشەيتىپ، ىشكى نارىقتاعى باعانىڭ وسۋىنە اسەر ەتكەن.
سوندىقتان جاڭا كۆوتالاۋ تەتىگى مال وسىرۋمەن جانە بورداقىلاۋمەن اينالىسپايتىن ەكسپورتتىق دەلدالداردى نارىقتان ىعىستىرىپ، وندىرىستىك ينفراقۇرىلىمعا ينۆەستيسيا سالىپ، تەحنولوگيا ەنگىزىپ، جۇمىس ورىندارىن قۇراتىن ناقتى وندىرۋشىلەردى قولداۋعا باعىتتالعان.
مينيسترلىكتىڭ مالىمدەۋىنشە، كۆوتالاردىڭ كولەمى مەن قولدانىلۋ مەرزىمى ۋاكىلەتتى ورگانمەن كەلىسۋ ارقىلى ايقىندالىپ، بۇل ىشكى نارىقتاعى جاعدايعا جەدەل ارەكەت ەتۋگە مۇمكىندىك بەرەدى.
جالپى العاندا، قابىلدانعان شەشىم قازاقستاندىق مال شارۋاشىلىعىن ۇزاق مەرزىمدى دامىتۋعا، ىشكى نارىقتى تۇراقتاندىرۋعا جانە تۇتىنۋشىلار ءۇشىن ساپالى سيىر ەتىنىڭ قولجەتىمدىلىگىن ارتتىرۋعا باعىتتالعان.
